Artistahon nga mga bata
Tungod kay nidagan pagka senador, unang natsugi ang papel nga gidala ni Lito Lapid (Pinuno) sa FPJ’s Ang Probinsyano. Karon kay hapit na man ang tingkampanya sa mga kandidato sa lokal nga posisyon, matsugi na sab ni sila si Edu Manzano (Pres. Lucas Cabrera) ug Jhong Hilario (Homer/Alakdan).
Kon nidagan sab ni si John Arcilla (Sec. Hipolito), tsugi-onon sab ni. Niadtong Miyerkules, gisugdan na pagpaila ang babaye nga maoy mopuli pagka kontrabida.
Sa mata ug alom nga maoy unang gipakita, duda nako nga si Lorna Tolentino kini. Unsa sab kahay iyang plano ug sinalbahis?
Sukad adtong una nakong pagkakita ni Nadine Lustre dihang nibisita sila ni James Reid sa Cebu, namatikdan nako nga mas nigwapa, mas may pagsalig sa kaugalingon ug mas angayan sila ni James.
Niapil si Nadine sa game show ni Luis Manzano nga Minute To Win It ug giinterbyu sa Tonight With Boy Abunda. Tungod kini sa pelikula nila ni Carlo Aquino nga Ulan nga ipasalida na karong Miyerkules, Mar. 13.
Duna diay kini gamay nga misteryo pelikulaha ug karon pa lang, duna nay nitawag ni Nadine nga bag-ong rayna sa pelikulang kulba-hinam ug hadlokhadlok.
Naintriga hinoon ko dâ!
Mga commercial nga nakalingaw nako karong bag-o lang mao ang kang Marian Rivera ug anak nga si Zia (nahisgutan na nako sa una pero may bag-ong version), sa usa ka sabon pangkaligo diin ang bata nanghambog sa iyang mama nga nilabang na siya sa karsada nga way kuyog ug nisayaw samtang naligo ug sa noodle commercial diin ang bata nga kulot og buhok gipangitaan sa iyang mama og hinungdan nga pakan-on siya sa pansit.
Ug tungod kay wa mosalir ang duha niya ka gimik, nipadayag na lang intawn kini nga mo-kiss na lang sa iyang mama. Cute!
Sa tan-aw nako, maartista kining mga bataa. Di na kahibudngan ang bahin ni Zia kay sa pinulongan pa sa pamelikula, showbiz royalty kini si Zia kay anak og mga artista.