Mga kaliwat ni Humabon
Motuo ka bag panuway, Brod?” matod ni Oliver sa iyang higala nga si Socrates. Ning sayong kabuntagon sa adlawng Dominggo, naglingkod sila sa duha ka bangkong tag-as. Nagtagsa silag lingkod ug nag-atubangay dinhi daplin sa eskina sa nagkurus nga duha ka dalan luyo sa munisipyo sa lungsod sa Amiraw. Estambayanan ni sa mga tawong gilaay na sa pagpundo sa ilang balay, labi na sa adlawng Sabado ug Dominggo.
Lima ka tawo ang makalingkod matag bangko. Kon mapuno ang manglingkod moalegre sila. ug mosamot kon may mobangka og ilimnon. Naghulat sila kang Atty. Rudy Gabucan nga molingkod dinhi ug mosugod dayon paghisgot sa pulong sa Diyos. Kasagaran mohapit siya dinhi kon padulong nang maghayk. Di siya mobiya kon di makabilin og kuwarta para ipalit og ilimnon. Apan di na siya moinom kay dugan nang mibiya sa bisyo tungod sa dayabites. Ganahan lang siyang mopalit alang sa mga higala ug silingan nga wa pay gipamati sa lawas.
Si Socrates nga miagi na sa pagka-sakristan wa na ganahi nga mosimba. Nakombinse siya sa abogado nga tanang relihiyon nga nagsangyaw karon, way tinuod. Ang matuod nga relihiyon nga gilarawan sa Bibliya, way bisan usa ka relihiyon nga nakatuman sa kalihokang gimandato sa Bibliya.
“Kon motuo tag Diyos, motuo sab tag panuway. Ang Diyos ug ang panuway o si Satanas naa sa Bibliya. Gani, higala man sila,” ni Socrates.
“Nganong higala god?” ni Oliver nga naisa ang kilay.
“Higala sila. Sa libro ni Job, nag-estoryahanay god sila. Gitugotan sa Diyos si Satanas nga motental kang Job,” ni Socrates. Naghinuktok kadiyot si Oliver.
“Unsa may ikasulti nimo sa kaagi ni Magellan ug ni Lapulapu? Nakadungog man ko nga usbon ang ‘history’ sa Mactan,” ni Oliver.
“Dili tingali usbon. Morag dugangan lang ang pagpasabot sa history, kon nganong napatay si Magellan ni Lapulapu nga mas gamhanan man si Magellan!” ni Socrates.
“Maayong hapon ninyo, Oliver, Socrates!” ni Rudy sa paghiduol niya sa duha.
“Maayong hapon sab, Atorni!” bawos nga mitimbaya ang duha.
Mahigalaon ang abogado ug miuna gayud pagtimbaya. Tigpasingot siyag lakaw libot sa plasa sa ilang lungsod. Unya makigkulokabildo una sa mga tawo sa eskina.
“Unsa gani hinungdan nganong napatay ni Lapulapu si Magellan?” ni Oliver nga mitan-aw sa abogado. Mao sab kini ang gibuhat ni Socrates.
“Kadtong hitaboa mora tog sangka ni David ug Goliath. Higante nga sundalo si Goliath. Si David bag-o lang naulitawo nga tigbantay og binuhi nga hay- opan ug way kasinatian sa pakig-away og tawo. Saplong lang ang iyang armas. Gitabangan sa Diyos si David. Sa iyang bahin, si Lapulapu sundang lang ang iyang armas batok sa espada ug taming ni Magellan nga nagsulob pa og puthaw nga ‘armor.’ Apan gilupig ni Lapulapu si Magellan, kay gitabangan sab sa Diyos si Lapulapu.
“Nganong gitabangan man si Lapulapu sa Diyos?” ni Socrates.
“Gikastigo sa Diyos si Magellan kay nagdala og imahe o idolo. Nasuko ang Diyos kaniya,” ni Rudy.
“Hain man ron katong imahe nga dala ni Magellan?” ni Oliver.
“Iyang giregalo kang Humabon sa wa pa siya makigsangka kang Lapulapu. Kon gamhanan pa tong imahe, makaluwas unta to kang Magellan,” ni Rudy.
“Subra sa upat ka siglo na man ang nanglabay, hain na man to ron?” ni Socrates.
“Naa sa Basilica Minore del Sto. Nino. Giampoan ug gidebotohan sa mga kaliwat ni Humabon,” ni Rudy.
“Nasipyat gyud diay ang mga kaliwat ni Humabon. Nasayod silang ang imahe wa gani makaluwas kang Magellan sa kamatayon, giampoan na man hinuon!” ni Oliver.
“Mao nang di ta kawad-an og katalagman. Kanunay nagpahinumdom ang Diyos sa iyang kalagot sa mga kaliwat ni Humabon,” ni Rudy. Mitindog siya ug mihinay paglakaw ngadto sa munisipyo dapit sa silangan. Karon lang mahitabo nga wa siya magbilin og kuwarta nilang Socrates ug Oliver para ipalit og ilimnon sa mga barkada. Basig inigbalik na lang niya. (KATAPUSAN)