BATAN-ON PA, ‘BIGTIME’ NA:
Si Rayven Bardon Gonza, 20, tinun-an sa high school, nakuhaan og 4.6 ka kilo nga gidudahang shabu sa usa ka buy bust operation sa C. Padilla street, Barangay Duljo Fatima, dakbayan sa Sugbo, niadtong Biyernes, Marso 8. Diin siya gikan sa supply sa drugs?
Gisubay pa sa Mambaling police station kon asa gikan ang 4.6 kilos nga shabu nga gibaligya ni Raven Bardon Gonza, 20, taga C. Padilla street, Barangay Duljo Fatima, siyudad sa Sugbo.
Ang giingong iyang gisuplayan og shabu nasikop sa laing operasyon.
Nasikop si Gonza sa buy bust operation sa mga sakop sa Mambaling police station alas 8:30 sa Biyernes sa gabii, Marso 8.
Nakuha gikan kaniya ang 19 ka medium packs ug laing upat ka dagkong pakete nga giputos sa packaging tape nga gibana-bana nga mobalor og P31,280,000.
Matod ni Sr. Insp. Francis Renz Talosig, hepe sa Mambaling Police Station, nga duha ka semana nila nga gipanid-an si Gonza human sila makadawat og report gikan sa ilang kasaligang informant nga nagpayuhot kini sa illegal nga drugas.
Human masuta nga tinuod kini, nakig-alayon dayon sila sa Philippine Drug Enforcement Agency (PDEA) 7 aron ilusad ang buy bust operation.
Usa ka pulis nga nagpatuo nga buyer, ni-transact kang Gonza 20 metros gikan sa iyang balay.
Sa dihang nakatunol na sa illegal nga drugas, nagpaila dayon siya nga pulis.
Lakip sa susihon kon ang supply konektado ba sa 40 kilos nga shabu nga gipadala kang Jocelyn Encila, kinsa nakuhaan og 10 kilos sa iyang panimalay sa lungsod sa Consolacion.
GISUPLAYAN
Ang hepe sa Labangon Police Station 10 Chief Insp. Keith Allen Andaya nikompermar nga ang ilang dinakpan nga si Arturo Mori, 36, sa sitio Mangga, Barangay Punta Princesa magpalitan kang Gonza.
Si Mori nakuhaan og 100 grams sa shabu nga mobalor og P680,000 atol sa buy bust operation alas 5 Sabado sa buntag, Marso 9.