Nagbalikbalik lang
Ang kakuwang sa tubig kanunay nang nasinati sa Sugbo sud na sa nanglabay nga dekada. Mahitabo kini kon moigo ang El Niño. Panagsa nga uwan o way uwan ang epekto niini. Gawas sa grabeng kainit nga nagdala og hangin, ang paspas nga paglambo sa urban nga mga dapit nakapasamot sa epekto sa kainit. Daghan nang mga kakahuyan kanhi nga karon mga subdivision na. Kay wa nay maugmad nga mga lote, nangabot na sa kabukiran sa Metro Cebu ang mga subdivision.
Ang kaniadto nga kakahuyan, gipangtarukan na og tag-as nga mga building. Ang mao nga mga estrukura momugna usab og grabeng kainit kay mga kongkreto.
Kon magbalikbalik ang problema sa suliran sa tubig, nganong di man pangitaan og mas malungtaron nga solusyon?
Usa niini mao ang pagpanalipod sa kakahuyan nga maoy usa sa labing epektibo nga mopugong ug mopundo og tubig sa ilawom sa yuta. Mas baga ang kakahuyan, mas maayo ug kusog ang tubod sa tubig.
Ikaduha, kinahanglan nga mo-invest ang kagamhanan og mga imprastraktura ug makinarya nga magamit nga tinubdan sa tubig. Sama pananglitan sa mga water treatment plant, diin ang ginamit nga tubig mahimong magamit og balik. Kanang ma-recycle.
Ang laing long term nga solusyon mao ang pagbaton og water desalination plant nga maghimong tab-ang sa tubig nga parat gikan sa dagat. Medyo mahal kini ug ang tubig nga gama gikan ini, apan tingali magamit kini nga back-up alang sa pagserbisyo sa publiko panahon sa pagnihit sa supply.
Makapahimangod tungod kay daghan ang mga reklamo sa social media kon magnihit na ang supply sa tubig, apan limitado ang option sa supplier sa tubig, sama sa Metro Cebu Water District (MCWD), kay nag-agad ra sab sila kon unsay makuhang supply.
Kaanindot unta kon ang kagamhanan aktibo sa pagpangitag solusyon aron ang problema di magbalikbalik.