Nag-unay na?
Gipalutaw karon sa kapulisan ang theory nga kining serye sa pagpamatay sa mga tawo nga nahilambigit sa illegal nga drugas, binuhatan ra usab kini sa kauban sa mga biktima sa sindikato. Nag-unay na. Gitumbok sa kapulisan ang gropo sa Kuratong Baleleng, ang gika-intapan nga gropo sa mga kriminal nga nahilambigit sa illegal drug trade, bank robbery, gun for hire ug kidnapping. Ang grupo gikan sa Mindanao, labi pa sa Ozamis City.
Bisan kon napatay na ang gi-ilang lider sa grupo, kanhi Ozamis City Mayor Reynaldo Parojinog, aktibo gihapon ang ubang mga sakop niini ug matod pa niabot na dinhi sa Sugbo. Matod pa nga ania dinhi sa Sugbo ang mga sakop sa Kuratong Baleleng aron mobawos sa mga pulis. Apan dili diay to kay ang ilang mga sakop nga medyo nabulilyaso sa ilang operasyon mao ang gipamatay. Matod pa ‘piyaet must die’. Buot ipasabot nga nag-unay-unay na ang grupo gumikan sa dakong kandidad sa drugas nga nakompiskar sa kapulisan.
Niadtong Dominggo, mokabat ngadto sa P200 milyones nga kantidad sa shabu ang nakompiskar sa kapulisan sa duha ka managlahing pagpangronda. Una, sa barangay Inayawan, Cebu City ug sa follow up operation sa Consolacion. Sa maong lungsod, nadakpan ni Jocelyn Encila ug iyang mga ginikanan. Ang drugas matod pa gikan sa National Bilibid Prison sa Muntinglupa. Usa ka Rustico Ygot nga matod pa adunay ka-relasyon ni Encila ang tinubdan.
Ang igsuon ni Jocelyn nga si Janelyn, gipatay sa Miyerkules sa gabii sa dakbayan sa Mandaue samtang gikan mibisita kang Jocelyn ug sa ilang mga ginikanan sa Consolacion Police diin sila na-detained. Unsa may motibo nga gi-apil man ang igsuon? Kon ang kapulisan maoy pangutan-on, sindikato ang nagpaluyo. Posible nga nasayod si Jenalyn sa kalihukan sa iyang igsuon mao nga gipahilom.
Di na ta matingala nga sa mosunod nga mga adlaw, si Jocelyn ug ang iyang mga ginikanan ang isunod. Aw, basta mo-apil ka sa illegal nga kalihukan, morag nagkoykoy ka sa lubnganan ang pikas nimong tiil. Kontra nimo ang mga awtoridad ug sa samang higayon ang imong kaubanan sa sindikato labi pa kon motiwalag ka. Ihawon ka gyud. Mao na kini ang nahitabo karon.