Fuel Masters mosuway pagsulod sa top 2
Mga duwa karon
4:30 pm- San Miguel Beer
batok NorthPort 6:45 pm- Phoenix
batok Ginebra Seguradong luna sa top 2 ang tinguha sa league-leader Phoenix Pulse Fuel Masters sa ilang pagpakigbatok sa Brgy. Ginebra Gin Kings sa main game karong gabii sa Philippine Basketball Association (PBA) 2019 Philippine Cup sa Araneta Coliseum.
Ang Fuel Masters kasamtangang nag-una bitbit ang 8-1 nga rekord apan ning puntoha, nagkinahanglan pa silang makakuha og laing kadaugan sa nahabilin nilang duha ka mga duwa gikan karon aron makaseguro'g sulod sa top 2.
Importante ang pagsulod sa top 2 gumikan kay nagtangag kini og twice-to-beat nga bintaha sa quarter-finals diin magparang ang No. 1 team batok No. 8, No. 2 batok No. 7, No. 3 batok No.6 ug No. 4 batok No. 5.
Ang Gin Kings nagbitay sa ikaunom nga dapit dala ang 3-3 nga rekord.
Sa laing bahin, ang defending champion San Miguel Beermen padayon nga manikaysikay nga makasulod sa top 2 sa ilang pagpakigbatok sa NorthPort Batang Batang Pier sa premirong duwa.
Ang Beermen, nga gikan sa dakong kadaugan batok sa NLEX Road Warrriors, 12111, kasamtang naglingkod sa ikatulong dapit bawon ang 5-3 nga baraha.
Sa ilang bahin, ang Batang Pier nahiluna sa may ilawom nga dapit nga nagdala og 2-4 nga rekord.