NAGA SEMIS KARON
Mga duwa karon 6:00 pm - USPF vs. USJ-R 7:30 pm. - UC vs. USC Kulbahinam nga mga engkuwentro ang gilaumang masaksihan karong gabii sa tinaktakay nga cross-over semi-finals round sa 1st City of Naga Inter-collegiate basketball tournament sa Enan Chiong Activity Center. Sa wa damhang pagkataktak sa multi-titled ug title-favorite
University of the Visayas (UV) Green Lancers, patas ug sikit nga panagsangka ang naaninaw tali sa University of Southern Philippines Foundation (USPF) Panthers, University of San Jose Recoletos (USJR) Jaguars, University of San Carlos (USC) Warriors ug University of Cebu (UC) Webmasters.
Ang Panthers nga napildi sa Webmasters sa opening day maoy nilabni sa no. 1 position sa Bracket A human surpresang gipalagpot niini ang UV sa katapusang adlaw sa eliminasyon.
Ang tulo pulos nagpas-an og 1-1 nga baraha apan pinaagi sa simplified quotient system, ang Panthers miguwa nga adunay pinakadako points, +9.
Nagsunod ang UC nga mitali og -2 samtang ang UV mimarka og -7 ug maoy sayong nanamilit sa ilang bracket.
Niini, ang Panthers ni coach Alan Cabatingan maoy makigsang sa no. 2 sa Bracket B nga mao Jaguars ni coach Leodie Garcia kinsa maoy mipalagpot sa Southwestern University (SWU) Cobras. Ang panagsangka sugdan sa alas 6 sa gabii.
Ang Warriors, nga maoy bugtong mi-qualify sa semifinals nga wala makaangkon og kapildihan, makigtinaktakay usab sa Webmasters sa main game.
Mosulod man tuod sa korte ang Warriors nga hataas ang moral apan sayod si coach Bong Abad nga malisod nga tahas ang iyang sagubangon batok sa Webmasters nga ning higayona pagadumalahon ni coach Rocky Alcoseba.