Floyd nahadlok mabulingan ang rekord: Fortune

Nagtuo ang conditioning coach ni Manny Pacquiao nga si Justine Fortune nga dili makig-away og balik si American Floyd Mayweather Jr. sa Pambansang Kamao ng Pilipinas gumikan nahadlok kining mabulingan ang iyang limpiyong 50-0 nga rekord.

Kon buot hunahunaon, mas dali na unta ihan-ay ang gikaintapang rematch ning higayuna gumikan kay pareho nang adunay koneksyon ang duha ka mga boksidor sa impluwensyadong boxing adviser nga si Al Haymon.

Apan gumikan sa maayong gipakitang away ni Pacquiao sa unanimous decision nga kadaugan niini batok ni American Adrien Broner, matod ni Fortune nga seguradong nagpanaganang motando si Mayweather sa rematch.

Midaog si Mayweather sa premirong away niadtong 2015 pinaagi sa kontrobersyal nga unanimous decision apan giingong naangol ang tuo nga abaga ni Pacquiao niadtong higayuna hinungdan nga wala kaayo niya nagamit ang iyang tuo nga kumo.

“I think Floyd may not be interested in another fight against Manny,” matod ni Fortune nga napatik sa www. philboxing.com.

“Manny looked good against Broner and maybe, Floyd’s not too keen on risking his undefeated record. That zero in Floyd’s record is important to him.”

Matod ni Fortune nga kon dili mahitabo ang rematch karong tuiga, hayan posibleng dili na gyud kini mahitabo.

Si Pacquiao kasamtangang nag-edad og 40 samtang si Mayweather nag-edad na'g 42 ug kon maghuwat pa'g dugang usa ka tuig, matod ni Fortune nga seguradong mawad-an na'g interes ang mga tawo niini.