Ika-500 nga sumad sa Kristiyanismo
Agi og pagpangandam sa dakong kasaulogan sa ika500 nga anibersaryo sa pag-abot sa Kristiyanismo dinhi sa Sugbo sa 2021, duha ka grupo sa mga layko sa artsidyosesis sa Sugbo ang gihatagan og bug-at nga tahas sa pagsangyaw sa lainlaing mga parokya, kapilya, kabarangayan ug bisan kadtong layo sa sabakan sa simbahan.
Ang Commission on the Laity (COL) mopasiugda sa kalihokan nga gitawag og Pagsangyaw 2021 nga nagdala sa tema nga “Gifted to Give” nga himuon sa dili pa magsugod ang misa sa matag Dominggo sugod sa Marso 24, sud sa tulo ka tuig o hangtod sa 2021.
Matod ni Fe Barino, chairperson sa COL, 10 minutos o 15 minutos sa dili pa magsugod ang misa, himuon ang pagsangyaw sa parokya diin ang magsasangyaw ipaambit ang modules o pagtulon-an nga hinikay daan sa Catholic Bishops Conference of the Philippines (CBCP).
Mahimo usab nga i-play ang video nga gihimo sa CBCP ug human dunay mopaambit og testimonya o basahon ang testimony atubangan sa mga manimbahay.
Kon kuwang og kompiyansa sa kaugalingon ang magsasangyaw, isuwat niya daan ang testimonya ug ipabasa sa pari, sa dili pa basahon, sumala ni Barino.
“Importante ang mga layko kinahanglan molihok kay dili nato pasagdan ang mga pari kay kita may makahimo gyud og kausaban kay daghan man ta,” pamulong ni Barino atol sa press conference nga gipatawag sa COL niadtong Sabado, Marso 9 sa Archbishop’s Palace, dakbayan sa Sugbo.
Sumala ni Palma, subay sa tema nga “Gifted to give,” grasya sa mga tawo ang nadawat nga pagtuo gumikan sa ilang pagkamatuohan ug gugma sa Diyos, hinungdan nga angay kini ipaambit ngadto sa uban.
“We may not deserve these but because we are gifted, unta we should also share, we should give. So, mao kini ang atong gibuhat,” dugang sa arsobispo.
Samtang ang Lay Organizations Movements Association Services (Lomas), ang gitahasan pagsangyaw ginamit ang mga gasa o programa sa ilang pundok. Sila ang gisanungan moadto sa mga barangay, institutions ug kadtong lagyo na sa sabakan sa simbahan ug di mga Katoliko.
“We need to teach them... to let them feel they are still part of the church,” matod ni Reynald Andales, overall coordinator sa Lomas ug vice chairman sa COL.
Sigon ni Dave Deriada, overall coordinator sa mga parokya ug coordinator sa District 1 sa COL, nga di mominos 50 ka mga parokya ang nipadala og mga representanteng layko atol sa gihimo nga pagbansay ug orientation aron sila mahimong takos nga mga magsasangyaw.
Ang Pagsangyaw 2021 ipatik, isibya ug ipaambit usab matag semana sa lainlaing mga sibyaanan sa radyo ug telebisyon, social media ug mantalaan gamit ang Binisaya nga audio ug video recordings aron mas lapad ang pagpakaylap sa maayong pagtulon-an ug pagtuo.
Ang Pagsangyaw 2021 ilusad karong Martes, Marso 12, sa IC3 sa alas 9 sa buntag, takdo sa tulo ka tuig sa dili pa ang Marso 16, 2021.