Bag-ong narco-list?

Dunay positibo ug negatibong epekto sa nag-ung-ong nga pagbutyag sa giingong bag-ong narco-list o listahan sa mga politiko o kandidato nga nalambigit sa sindikato sa pagpayuhot sa gidiling druga. Ang Department of Interior and Local Government (DILG) gikataho nga nasayod na sa mga politiko nga naa sa bag-ong narco-list ug kini ilang iyagyag sa publiko sa dili moabot ang eleksiyon karong Mayo 13 o ning semanaha?

Nindot ron makonsiderar sa mga botante kon kinsa ilang taktakon nga kandidato o dili hatagan sa balaang mandato sa pagbuto. Apan sa pikas bahin, dakong kadaut ngadto sa politiko nga nasaypan lang nga nabutang sa maong listahan.

Sama sa unang listahan nga gibutyag ni Presidente Rodrigo Duterte nga kontrobersiyal. Daghang nagkwestiyon human walay saktong hashas. Daghang nipiyaet.

Apan igo lang moingon nga listahan lang kini ug dili pa mahukmanon? Unsay nahitabo sa ubang naa sa listahan nga gibutyag sa Presidente nga walay klaro, dili ba sama na nga sila nakombikto sa sala.

Insakto ang sugyot ni Cebu Archbishop Jose Palma nga kinahanglan nga dili ‘listahan lang’ ang ipagawas kon dili kadto nang nahashasan pag-ayo o niagi og higpit nga veri ication process sa awtoridad.

Mao kini ang reaksiyon ni Palma nga nabalaka human sa pamahayag ni Presidential spokesman Salvador Panelo bahin sa pagpagawas ning semana sa maong narco-list.

Ug laing kabalaka, wala kaha kini lama sa pulitika? Basin ang mga kontra lang sa administrasyon nga nalista? Nasayod kita nga dako kini og epekto sa eleksiyon.

Samtang dili kita gusto nga mapili ang mga miyembro o protektor sa sindikato sa druga, apan dili usab maayo nga mapagan ang ubang politiko nga enosente tungod sa pulitika.

Hinaut nga dili lang listahan, aksiyon ang gininakahanglan.