PAGPATAY GIPADALI OG SULBAD

PASPASI ANG PAGSULBAD, PAGSIKOP SA KILLERS SA 16 ANYOS: MALACAÑANG

Nakadapit sa pagtagad sa Malacañang ang pagpatay ug paglaplap sa nawong ni Christine Silawan hinungdan nga nimando kini sa Lapu-Lapu City Police Office sa pagsulbad gilayon kaso sa labing daling panahon.

Samtang aduna nay suspek nga gisubay ang kapulisan sa Lapu-Lapu City sa linuog nga pagpatay kang Christime, kinsang lawas napalgan niadtong Marso 11 sa kaadlawon sa hawan sa Sityo Mahayahay, Brgy. Bankal.

Saysay ni Sr. Supt. Limuel Obon nga nakadawat siya og kamanduan gikan sa regional director sa Police Regional Office7 (PRO) 7, Chief Supt. Debold Sinas, human gipasahan sab sa mando sa Directorate for Investigation sa Camp Crame, kabahin sa order sa Malacañang sa pagsulbad sa maong krimen.

“Of course they (Malacañang) want a speedy resolution of the case, as soon as possible. That (pagsulbad sa pagpatay) is our intention talaga,” matod ni Obon ngadto sa mga tigbalita.

Gumikan niini, ang LCPO niumol og Special Investigation Task Group nga motutok sa pagsulbad sa kamatayon ni Silawan.

Kagahapon sa buntag nipahigayon og case conference si Obon sa iyang mga sakop nga lakip sa pag-imbestigar sa kaso.

Si Lapu-Lapu City Mayor Paz Radaza nimando usab sa kapulisan sa dinaliang pagsulbad.

“Isip usa ka inahan, nasubo gyud ko sa panghitabo niining dalagita. Galisod ko’g tan-aw nga daw niabot sa punto nga nakapangotana ko, giunsa ni nila pagbuhat? Grabe kaayo ilang gibuhat. Di gyud binuhatan og normal nga tawo. Galisod ko’g hatag sa akong statement ngadto sa media kay di ko gusto dugangan ang kasubo nga gibati karon sa pamilya. Ato usa silang respetaran samtang nagsubo pa sila karong panahona.Ato kining isalig ang imbestigasyon ngadto sa atong kapolisan kay ilaha man kining trabaho. Ang ato-a mao ang pag-ayuda ra gyud sa pamilya nga nagsubo,” nagkanayon si Radaza.

SUSPEK

Adunay “person of interest” o suspek, apan nagdumili na si Obon sa paghatag og dugang detalye.

Sa nagpadayon nilang imbestigasyon, nakompirmar nila ang pamahayag niadtong laing batan-on nga gika-uban ni Christine sa pagpanga-on og balut sa gawas sa Sacred Heart of Jesus Parish, Barangay Pajac base sa kuha sa CCTV camera sa dapit.

Samtang laing footage nga nakita sa kapulisan nga adunay susama og bayhon ni Christine ingon man parehas ang gisul-ob niadtong higayona nga nag-angkas og motorsiklo nga gitung-an sa drayber ug back-rider.

Apan di maklaro kon si Christine maoy nag-angkas nga nakita sa footage tungod na sa kalayo niini .

MGA HINABANG

Gi-uwan og hinabang ang banay nga Silawa sa ilang pagbangutan.

Si Radaza nihatag sa iyang personal nga hinabang ingon man ang grupo sa kababayen-an sa City Hall nagtampo-tampo aron ikadunol sa pamilya.

Ang buhatan ni Obon nipaambit og financial assistance.

Nangunay ang mayor sa pag-andam sa dapit diin hayaon si Christine, diin ang Siyudad mobayad sa punerarya, haya ug pagpalubong.

GRABE

Nakaangkon og 30 ka samad dinunggaban si Christine, base sa autopsy report ni Supt. Benjamin Lara, pangu sa PNP Crime Lab,

Siya dunay usa ka samad dinunggaban sa liog, 20 sa lawas ug siyam sa duha ka mga bukton.

Ang nakapatay kaniya mao ang samad sa liog ug lawas.

Matod ni Lara nga dako ang posibilidad nga sobra sa duha ka tawo ang naghimo sa krimen sanglit di mahimo sa usa lang.

Makita usab nga nisukol si Christine tungod sa daghang samad niini sa bukton, daw sa nanagang. “Sa resulta ng autopsy, we found out that the victim died of multiple stab wounds to the neck and to the

body,” matod ni Lara. Human nga di na mailhan ang nawong, ang bugtong mga gamit lang niini ang magpamatuod nga ang lawas iya ni Christine, gipakuhaan ni Lara og dental sample ug gipadala sa ilang ulohang buhatan.