Duna nay suspek sa pagpatay sa 2 ka magsuong babaye sa Calbayog

Calbayog City, Samar--Kapulisan ning lungsod duna nay suspek sa pagpatay sa duha ka mga magsuong babaye.

Ang magsuong babaye nakaplagang patay sa buntod nga bahin sa Barangay Macatingog ning siyudad.

Ang PRO 8 nihangyo nga di nganlan ang magsuon nga nagpanuigon og 16 anyos, tinun-an sa grade 10 ug 6 anyos, tinun-an sa pre school.

Base sa inisyal nga imbestigasyon sa kapulisan, sayo sa buntag niadtong Pebrero 23, nilakaw ang duha ka gikan sa ilaha aron mobisita sa ilang lolo.

Pebrero 24 sa alas 9 sa buntag, nipauli ang duha gikan sa balay sa ilang lolo.

Pebrero 28, nabalaka ang inahan sa duha gumikan kay wa pa maabot sa ilang balay.

Sa samang adlaw, miadto sa balay sa apohan ang inahan ug iyang nasayran nga niuli na kini niadtong Pebrero 24.

Gumikan sa gibating kakuyaw, gibuhat sa pamilya ang tanan aron makit-an ang duha ka mga bata.

Base sa report sa kapulisan ang lolo maoy nakakita sa duha ka bata nga wa nay kinabuhi sa buntod nga bahin sa barangay niadtong Pebrero 28.

Niini, ang kapitan sa barangay nga si Rogelio Castillo nangayog tabang sa Oquendo Police Station bahin sa maong insidente.

Matod ni Police Superintendent Joie Yape, hepe sa Calbayog City Police, duna na silay usa ka person of interest sa maong insidente.

Dugang ni Yape waa pa ma determinar sa taga City Health ang hinungdan sa kamatayon sa duha ka bata gumikan kay naa na kini sa state of decomposition.

“Ang usa ka bata duna pay t-shirt pero ang usa wala na,” matod ni Yape.

Wa mosulti si Yape kinsa ang suspek kay nagkuha pa sila og dugang mga kasayuran.