1.5 ka kilo nga buhok nakuha gikan sa tiyan sa bata
Motimbang og 1.5 ka kilo nga buhok ang nakuha gikan sa tiyan sa usa ka 8 anyos nga batang babaye sa China human maoperahi sa mga doktor.
Ang bata nga nailhan lang sa pangan nga si Feifei, hilig mokaon sa iyang kaugalingon nga buhok sukad nga siya nagedad og dos anyos.
Siya nisulti sa iyang inahan nga nihunong na siya pagkaon sa iyang buhok sa sayong bahin ning tuiga.
Apan sa pagsugod sa Pebrero, si Feifei naluya sud sa usa ka semana sa sige og suka ug pagpanakit sa tiyan.
Sa report sa Mirror News, nasayran nga nabantayan sa inahan sa bata nga niburot na ang iyang tiyan hinungdan nga gidala na kini sa Donghua Hospital sa Guangdong, China.
Si Dr. Tang Shilong nipaubos ni Feifei sa gitawag og gastric lavage, sumala sa report sa Southern Metropolitan Daily.
Ang gastric lavage, kon gitawag usab og stomach pumping o gastric irrigation, kay usa ka paagi sa paglimpyo sa sulod sa tiyan.
Nakugang ang doktor dihang iyang nakit-an sa CT scan sa bata ang mga naglambod nga buhok nga naporma na og bola.
Apan naglisod siya og kuha gamit ang endoscopy kay nigahi na kini.
Nunot niini, gioperahan na ang bata aron pagkuha sa naglambod nga mga buhok ug kini nitimbang og tulo ka libras.
Sumala sa doktor, ang bata nakasinati og pica nga usa ka eating disorder diin ang usa ka tawo mokaon og mga butang nga dili pagkaon.