EROPLANO MIBALIK KAY BABY NABIYAAN

Nag-viral sa social media ang usa ka video nga nagpakita sa usa Saudia nga piloto nga nihangyo sa air traffic controllers (ATC) nga mobalik sila sa airport sa Jeddah.

Ang eroplano kinahanglan nga mobalik sa tugpahanan gumikan kay ang usa sa mga pasahero niini, usa ka inahan, ang nabiyaan ang iyang anak sa terminal.

Ang mga eroplano tugotan nga makabalik sa tugpahanan kon dunay major emergency ug naay dautan nga nahitabo nga magpugos sa piloto nga mobalik sa agi.

Apan kon mobalik tungod kay nahibilin ang usa ka masuso, kini usa ka talagsaon nga panghitabo.

Ang Saudia nga eroplano padung na unta sa Kuala Lumpur, Malaysia, apan kinahanglan nga mobalik sa King Abdulaziz International Airport sa Jeddah, Saudi Arabia, human ang usa ka inahan nipahibawo sa cabin crew nga nahikalimtan niya ang iyang anak sa boarding area sa terminal sa maong tugpahanan.

Ang operator dali nga nangutana sa flight number ug nadungog pa kini sa clip nga nangutana sa iyang kauban nga operator kon unsay protocol bahin niini.

Sa report sa Gulf News, nasuta nga bisan kon nakugang ang ATC operator pagkasayod sa nahitabo, apan nitugot kini sa piloto nga makabalik.

“Ok, head back to the gate. This is totally a new one for us!” sumala sa operator.

Sa mga komento sa video, dunay mga netizen ang nakadayeg sa piloto sa iyang pagkamaloloy-on nga nisugot nga mobalik sila sa agi aron makuha ang bata.