Kulto naghulga?

Katuhoan-dili apan angay nga susihon, kulto naghulga? Usa kini sa mga anggulo nga nitumaw bahin sa linuog nga kamatayon sa 16-anyos nga Christine Silawan sa Sitio Mayahay, Barangay Bangkal, dakbayan sa Lapu-Lapu niadtong Lunes sa kaadlawon, Marso 11. Ang kulto ug serial killer nga anggulo nitumaw human nasubay nga dunay susamang panghitabo usa sa ka biktima gidunggab sa makadaghan higayon ug gipanitan usab ang nawong sa dakbayan sa Danao niadtong Enero 11 ning tuiga.

Ang PNP Crime Laboratory nga nipagawas sa resulta sa autopsy sa lawas ni Silawan kagahapon, Marso 12. Duna kini 20 ka samad-dinunggban ug wala kini malugos. Dunay mga timailhan nga nisukol ang biktima tungod sa mga garas sa lawas.

Unang nihulawgay si PSSupt. Limuel Obon, direktor sa LapuLapu City Police Office (LLPO), nga kini ang labing ngilngig nga iyang gitubag nga alarma human dili makatutok sa patay tungod sa kangilngig ug kaluoy.

Dili kita kabasol sa publiko, labina sa taga Lapu-Lapu, nga dili mahiluna samtang wala pay katin-awan o kasulbaran ang maong kaso. Mga mamumumo gawasnon pa. Dili tiaw ang kangilngig sa pagpatay sa maanyag nga dalagita.

Hinaut nga masubay pag-ayo sa Special Investigation Task Group sa LLPO ang tanang anggulo, gikan sa personal nga motibo, serial killer ngadto sa mga adik o naulipon sa gidiling druga.

Ang Police Regional Advisory Council mohatag og P100,000 sa makahatag og kasayoran o moila sa suspek sa pagpatay sa dalaga. Usa ka langyaw ang nitanyag nga mohatag og P500,000 nga ganti.

Bug-at kini nga pasidaan labina sa kabatan-onan batok sa paglakaw sa lawom nga gabii ug hilit nga dapit. Maayong matulog og sayo aron dili makasugat og “kulto.”

Molitok kita og pag-ampo alang sa kalag sa biktima. Manawagan og hustisya ni Christine.