3 ka suspek sa pagpatay sa dalagita

Atong gikondinar ug gisaway ang mga kriminal nga maoy responsable sa pagrape ug pagpatay sa 16 anyos nga si Christine Lee Silawan.

Sama sa mananap ang gihimo sa mga suspetsado kay ilang gipanitan ug gibobo-an ug aksido ang nawong sa bata nga wanay kinabuhi nga nakit-an sa bakanteng luna sa Barangay Bangkal, Lapu-Lapu City.

Tungod niini gikondinar ni Mayor Paz Radaza ug mayoralty candidate Boy Radaza ang nahitabong krimen sa ilang siyudad.

Ang nahitabo ni Silawan maoy unang bangis nga krimen sa maong lugar matod pa ni Senior Supt. Lemuel Obon, hepe sa kapulisan sa siyudad.

Ang Lapu-Lapu usa ka malambo-ong siyudad nga gihugpaan sa mga lokal ug langyawng mga turista tungod sa kanindot sa mga beach resorts ug hotels anaa sa luwas nga kahimtang ang mga bisita ug mga molopyo bisan pa sa panghitabo.

Ang nahitabo ni Christine usa lang ka isolated case. Ang good news sa bad news kay dunay saksi sa pagpanglugos ug pagpatay.

Tulo ka mga adik ang naghimo sa krimen. Gitumba ang bata ug gigunitan samtang ang usa maoy naglaplap sa panit sa nawong.

Tungod kay linuog ang nahitabong krimen, niawhag ang netizens sa pagbalik sa death penalty.

Gusto sab nila nga dauban ug patyon ang mga suspetsadong kriminal. Nagumikan sa ilang kalooy sa gidangatan sa bata.

Para nako, sa pagkakaron wa kinahanglana ang death penalty. Kay ang mga suspek sa bangis nga krimen gipangpatay man sab.

Sa death penalty taas ang proseso sa paghusay sa kaso. Ug dunay kabalaka nga ang masilutan sa death penalty ang mga kabus nga suspek.

Sa panahon karon daghang kaso sa pagpatay nga naglambigit sa mga tawo nga adunay criminal record .

Gani gipasangil ang mga panghitabo nga ang mga pulis maoy naghimo. Apan gihimakak sa kapulisan nga sila ang responsabli sa pagpamatay sa mga kriminal.

Atong balikan ang kaso sa kamatayon ni Christine. Kon imong tan-awon ang kaso grabi ang kasuko sa naghimo sa krimen. Ug kini komon na kaayong buhaton sa mga adik sa druga.

Mao nga gikinahanglan nga tan-awon ang tanang anggulo kon unsa man gyud ang motibo sa kaso.

Ilakip sab sa paglili ang crime of passion. Human nahibaw-an nga dunay gika-relasyon kaniadto ang biktima.

Ang inahan sa bata misulti nga dunay higayon ang iyang anak di mouli sa ilang balay ug adto matulog sa balay sa iyang amiga.

Email: efrenlonzon71@gmail.com Text: 09235562777