For once in my life
Sa pagpanglabay sa mga adlaw, naklaro ko na gyud nga nahigugma ko kang Randell. Usa ka pagbati nga gikaguol gyud kaayo nako. Di ko kini angay paundayonan. Igsuon ko si Roilen, di ko gusto nga makapasakit niya. Naningkamot ko nga maka-move on. Di kay si Randell ra ang lalaki, naay daghan.
Apan bisan unsaon ko sa paghikalimot kang Randell, misamot hinuon siya pagka bililhon nako. First time kong nagmahal og lalaki. Guwapa ko, daghan ang nag-ingon ani nako labi na sa akong mga suitors. Apan bisan usa kanila wa koy gihigugma, wa koy nagustohan. Nganong si Randell pa man gyud nga boyfriend sa igsuon kong bayot?
Sa hilom maghilak ko. Nawad-an na gani kog gana sa pagkaon kay mahunahuna ko kanunay si Randell.
“Sister Ate, sakit kaayo ang gibuhat ni Randell nako.”
Usa ka gabii naghilak si Roilen. Migakos siya nako. Mituyo gyud siya pagsulod sa akong kuwarto dihang nangatulog na sila si Mama ug Papa. Nahibulong ko. Hinay lang ang paghilak sa akong igsuon, tingali di siya gusto nga makamatikod ang among parents.
“Unsay nahitabo, Roi? Unsay gibuhat ni Randell nimo?”
“Nakigbuwag siya nako, sister Ate. Sakit gyud kaayo, uy, kay wa man koy nahimong sa’a niya.”
Ning higayona nagbakho na si Roilen. Gibati ko ang gibati niyang kaguol. Karon ko pa nakita ang akong igsuon nga mihilak gyud pag-ayo timailhan nga gisakitan gyud siya sa pagpakigbuwag ni Randell niya.
Aw, daan na man siyang nagsulti nako nga love gyud kaayo niya si Randell.
Gihapuhap ko ang bukubuko sa akong igsuon. Gipasagdan ko siya nga makapagawas sa iyang kaguol. Unya dihang naghingus-hingos na lang siya, mibuwag siyag gakos nako. Namahid siya sa iyang mga mata sa gikuptan niyang panyo. Milingkod siya sa ngilit sa akong kama. Mitapad kog lingkod niya.
“Ngano man kuno, Roi? I mean, nganong nakigbuwag man siya nimo?
“Wa diay kuno siyay gugma nako, sister Ate. Nakita na kuno niya ang girl nga tinuod niyang love.”
Wa ko makatubag. Ambot ba nga kalit man kong gikulbaan.
“Ikaw, sister Ate, ang gipasabot ni Randell. Love kuno ka niya.”
Nagnganga ang akong baba apan way migawas nga mga pulong.
(TAPUSON SUNOD GULA)