Kamatayon ni Cito Serosoy
JULIO L. TELESPORO Poblacion, Alcantara, Cebu
Usa ka yanong baryuhanon si Cito Serosoy sa ilang baryo sa Panas Kugtong. Nakatapos siya sa hayiskol ug nangandoy nga mosulod pagka pulis. Tungod kay kaila sa iyang amahan ang naglingkod nga mayor sa lungsod, nahimo siyang pulis. Dihang nagserbisyo na siya isip pulis nabihag siya sa usa ka maanyag ug bigot nga babaye nga taga poblasyon. Nakigsuod siya sa amahan niini nga palahubog. Usahay palitan kini niya og binotelyang bino ug ubanan sa inom.
Nagpakasal gayud si Cito kang Marina bisan sa pahimangno sa inahan ni Cito nga si Marina may pagka maldita ug ambisyusa. Sa ilang kasal gitubag lang ni Cito ang pasiaw sa iyang mga barkada nga nagkanayon, “Sus, kon wa pa tiuni sa iyang kuwareng, di gyud siya ka-jerjer!”
Nanimuyo silang malipayon ipon sa iyang ugangan, sanglit bugtong man nga anak si Marina. Iyang naubserbahan ang iyang asawa nga kapritsusa ug may pagka dominante. Apan iya kining gidawat kay dulot sa bukog gayud ang iyang paghigugma sa asawa.
Dihang miabot ang direktiba sa kadagkuan sa kapulisan nga nagmando nga kinahang- lang gradwado sa kolehiyo ang tanang pulis, napugos si Cito pag-eskuyla sa duol nga unibersidad. Ug natapos da niya ang kursong Criminology sa kolehiyo. Unya, tungod sa awhag ni Marina, nagpabalhin siya og asaynment sa siyudad, kay kuno sa probinsiya imbaw ug bunog ray sud-an, samtang sa siyudad kay duol kaayo sa buhilaman, daghang mga sud-an kon putahe ang kailin-ilinan.
Sa siyudad gipangayo ni Marina ang ATM card sa suweldo ni Cito kay siya nay modala sa badyet. Gihatagan lang niyag pipila ka pesos si Cito alang sa sigarilyo. Maibog intawon si Cito nga magtan-aw sa iyang mga kauban nga sige lang moadto sa bulangan ug mga sikat nga imnanan. Maghisgot pa gyud silag uyab-uyab bisan og dagkong minyo. Nahinumdom siya sa ilang pagpuyo sa probinsiya nga bisan og layo sa gitawag nga buhilaman, apan layo sa mga tentasyon.
Gibati siyag kalipay dihang gipaumentohan sa Presidente ang ilang mga suweldo. Apan daw wala kini makaapekto kaniya kay kontralado man sa iyang asawa ang iyang ATM account. Unya iyang na-obserbahan nga nakat-on na og sugal ang iyang asawa tungod sa galgal sa mga silingan. Usa- hay buntag na kining mopauli gikan sa tong-its ug madyong, pero dili siya makaako pagbadlong kay basig moresulta lang og kasamok.
Usa ka higayon niana dunay miduol kaniya nga usa ka desenteng tawo ug mitanyag kaniyag dako nga kantidad bugti sa iyang pagpahibalo kon ugaling dunay operation ang ilang presinto batok sa ilegal nga mga drugas. Supak gayud unta sa iyang konsensiya, apan tungod sa tawhanong awhag gidawat niya ang pasiunang bayad uban sa numero sa selpon nga magsilbi nilang lambigitan. Ug nakapahimulos siya sa maong transaksyon. Iya pa ganing wiktan og bahin ang iyang asawa nga wa gani mangutana kon diin gikan ang maong salapi.
Apan wala magdugay ang yawan-ong pagpahimulos ni Cito, kay usa ka higayon niana, samtang nagsakay siya sa iyang motorsiklo aron mokulekta sa iyang payola bisan udto pang dako, kalit siyang gibabagan sa usa ka awto ug gipusil siya sa mga lulan niini nga miresulta sa kalit niyang kamatayon.
Sumala pa sa balita nahibaw-an siya sa iyang pakiglambigit sa sindikato sa ilegal nga mga drugas isip protektor. Gidudahan nga mga ‘vigilante’ ang nagpatay kaniya.
Sa iyang haya usa sa iyang mga suod nga higala nga nasayod sa iyang kahimtang sa pagpuyo nagbagulbol nga miingon, “Porbida, kon gihatagan lang unta og igo-igong alawans si Cito sa iyang asawa, dili tingali unta kini motukob sa dautang sistema sa panginabuhi!”
(KATAPUSAN)