PANAGTIGI SA PAGPAKABUHI
Mga duwa karon:
4:30 pm- Magnolia batok Columbian Dyip
7:00 pm- NLEX batok Alaska
Pulos mosagubang og krusyal nga tahas ang upat ka teams nga mopakita’g akyon karong adlawa sa Philippine Basketball Association (PBA) 2019 Philippine Cup sa Araneta Coliseum.
Sa premirong duwa, ang Magnolia Ang Pambansang Manok Hotshots makigbatok sa Columbian Dyip samtang magtagbo sa main game ang Alaska Aces ug NLEX Road Warriors.
Ning puntoha, wala pa’y bisan usa sa nangahisgutang puwersa ang nakaseguro na’g luna sa playoffs.
Apan sa tanan, ang Road Warriors mao ang nahimutang sa labing delikadong sitwasyon gumikan kay nagbitay kini sa may lubot nga dapit sa standing bitbit ang 2-5 nga rekord.
Sa ilang bahin, ang Aces anaa sa ikaunom nga luna nga adunay 3-3 nga rekord.
Sa ilang panagtagbo, gilaumang magpinaksitay og maayo ang Road Warriors ug Aces alang sa ilang tinguha nga makadagkot og kahayag sa ilang nagkagamay nga agianan paingon sa playoffs.
“It’s not easy,” matod ni Alaska coach Alex Compton.
Apan dili ikalimod nga mas lisod ang sitwasyon sa Road Warriors ni coach Yeng Guiao.
Ang Hotshots, nga usa unta sa gituohang makaabot sa finals ning maong komperensya, nagkagidlay sab ug kasamtangan kining nahiluna sa ikasiyam nga dapit dala ang 2-4 nga rekord.
Sa ilang bahin, ang Dyip, nga kanunay lang matagak sa
elimination round, kasamtangang naa sa ikapitong dapit bitbit ang 4-5 nga rekord.
Kon kinsa ang mga mapilde ning mga kombati karon seguradong mounlod og layo sa standing nga magpahanap og samot sa ilang poruhan paingon sa playoffs.
“It’s another playoff game for us. We have considered every game na do or die na sa amin because of our situation,” matod ni Magnolia coach Chito Victolero.
“But I think iyung mga players ko naman they embraced iyung challenges, eh. We’re starting to get our rhythm and our defensive mindset.”