MISULBONG NA SAB ANG ROCKETS
Padayon ang pagsulbong sa host Houston Rockets ug gipangmakmak niini ang Charlotte Hornets, 118-106, aron irehistro ang ilang ikasiyam nga sunodsunod nga kadaugan sa National Basketball Association (NBA) kagahapon.
Ning panahuna nga himsog ang puwersa sa Rockets, ilaha nang napagawas ang hingpit nilang katakos nga naghatag kanila og imahe nga puwedeng makapusgay sa gingharian sa back-to-back champion Golden State Warriors.
Niadtong panahon nga gihasol ang Rockets sa pagkaangol sa uban nilang mga pambato, daw imposibleng paningkamot sa opensa ang kanunay nga buhaton sa ilang lider nga si James Harden.
Apan dihang kompleto na ang ilang puwersa, hayan migaan ang gipasang obligasyon ni Harden gumikan kay aduna na man siya’y saktong suporta gikan sa iyang mga kauban.
Gipangulohan gihapon ni Harden ang Rockets pinaagi sa iyang 28 puntos samtang nidugang og 22 puntos si Eric Gordon apan ang nakalahi lang ning higayuna, nakatampo sa ilang opensa ang tanan nilang mga kauban gawas lang sa usa. “It was a total team effort,” matod ni Harden, kinsa maoy kasamtangang MVP.
Adunay higayon sa sayong bahin sa season nga nagbitay sa labing ubos nga puwesto sa Western Conference ang Rockets dala ang 11-14 nga rekord.
Apan ning higayuna, nagpatong na sila sa ikatulong dapit bitbit ang 42-25 nga rekord.
Gipasabot ni Harden nga sukwahi kaniadto, dili na kaayo siya mopugos sa pagdala sa opensa sa Rockets dihang nakabalik na ang sila si Clint Capela ug Chris Paul gikan sa pagkaangol.
“Yeah,” matod ni Harden. “I just take what the defense gives me. Making shots or missing shots, I’ll take the same shots every single game ... and I got off the ball and multiple guys got open shots. I don’t really try to press anything. I just try to take what they give me and be effective.”
Si Capela nitampo og 19 puntos ug 15 rebounds alang sa Rockets samtang si Paul nidugang og 10 puntos ug 10 rebounds.
Pinaagi sa ilang kayod isip usa ka puwersa, nasugakod sa Rockets ang kabangis nga gipakita sa lider sa Hornets nga si Kemba Walker, kinsa nagpakatap og 40 puntos, 10 rebounds ug pito ka assists.
“For him to come in here and compete at this stage without a lot of his guys out there on the floor says a lot about his character and who he is as a person and as a leader,” asoy ni Charlotte coach James Borrego kabahin kang Walker.
Ang Rockets nakaposte og 28 puntos nga labaw sa 3rd quarter apan gipahak kini sa Hornets ngadto sa 13 puntos na lang sa 4th quarter.
Hinuon naghugpong og balik ang Rockets aron ilansang ang 12 puntos nga kadaugan.