Birthday blowout sa 100-anyos nga lola
Laing centenarian na usab ang gidalitan og usa ka “birthday blowout” sa kagamhanan sa dakbayan sa Lapu-Lapu kagahapong adlawa, Marso 12.
Niining higayona, usa ka 100-anyos nga lola na usab sa Sitio Lasang Soong, Brgy Mactan, dakbayan sa Lapu-Lapu ang gisuprisa sa kagamhanan atol sa iyang adlawng natawhan.
Ang 100-anyos nga lola nailhang si Margarita Atillo, kinsa tuig 1980 pa nga nanimuyo sa dakbayan. Si Atillo gidalitan og cake ingon man mga lamiang pagkaon sa kagamhanan sa dakbayan nga gisaw-an usab sa mga kabanay ug mga silingan.
Personal usab nga gitunol ni Lapu-Lapu City Mayor Paz Radaza ang P100,000 nga tseke gikan sa kagamhanan isip Centenarian Cash Award ngadto kang Atillo. Sa miaging semana usa ka 102-anyos nga si Maximina Quintero nga taga-Brgy. Pusok ang gidalitan usab sa kagamhanan sa dakbayan og usa ka birthday blowout.
“Mga long life gyud ni ang mga taga Lapu-Lapu. Posible sa ilang mga eating habits and most probably ang pagsilbi usab sa ilang pamilya sa ilaha mao nay nakapataas sa ilang kinabuhi,” matod ni Radaza.
Si Erlinda ug Herminia Atillo, ang duha sa mga anak ni Margarita, mibutyag nga ang sekreto ra sa ilang inahan mao ang dili pagkaon og karne.
Utan ra, matod pa, ang kanon niini ug lakip usab sila nga mga anak ang gipadako nga utan ra usab ang permi nilang masud-an kada adlaw.
Ilang gibutyag nga gagmay pa lang sila matag adlawng Dominggo ra gayud sila makakaon ug karne apan isagol gihapon kini sa mga utan.
Dili usab kini ganahan og dunay asin o bitsin ang karne.
Lumad nga taga lungsod sa Borbon ang kaliwat sa banayng Atillo sa wala pa nibalhin og puyo sa dakbayan.
Ang anak niining si Erlinda napangedaron na karon ug 67-anyos samtang si Herminia 80-anyos na usab.
Si Margarita adunay walo ka mga anak apan unom na lang ang buhi niini. Moabot sa dulan 80 ang iyang mga apo ug apo sa tuhod. Nabiyuda siya niadtong tuig 1975.