OMBUD. CV IPA-INHIBIT NI SONNY O.

Toledo City Mayor John Henry Osmeña miawhag ni Deputy Ombudsman for the Visayas Paul Elmer Clemente ug sa tibuok buhatan niini nga mo-inhibit sa pag-imbestigar sa reklamo nga gipasaka ni kanhi kongresista Pablo John Garcia batok niya ug laing pito ka mga opisyal sa dakbayan sa Toledo kabahin sa paggamit sa P210 milyones nga pundo sa Clean and Green Program.

Atol sa press conference pagka Huwebes sa udto, Marso 14, si Atty. Inocencio de la Cerna Jr., abogado ni Osmeña, nibutyag nga mag-classmate sa Law Class sa University of the Philippines (UP) niadtong 1993 si Garcia ug Clemente.

Sila niduso og motion for inhibition sa Ombudsman for Visayas pagka Huwebes sa hapon, Marso 14, alang sa pagpa-inhibit kang Clemente ug sa tibuok opisina niini.

“We have records and cases from the Supreme Court which support our view, that rightly or wrongly if there is a perceive relationship, or if any of the party can ask lack of confidence with the judge or agency hearing the case, then it is a matter of decency and procedure that a judge or the agency must inhibit himself or itself,” pasabot sa mayor.

Sigon ni Garcia nga bisan og gikan sila sa sama nga klase ni Clemente sa UP Law, wala na sila magkaestoryahanay niini sukad sila ni-graduate.

Matod niya, kini usab ang susama nga deputy ombudsman nga ni-dismiss sa iyang igsuon nga si kanhi Dumanjug Mayor Nelson Garcia gikan sa serbisyo ug nisuspenso usab sa iyang laing igsuon nga si Barili Mayor Marlon Garcia.

Ang kampo ni Osmeña nikwestyon usab kon nganong pinili lang ang giapil ni Garcia sa iyang reklamo diin ang mga kaatbang lang niini sa umaabot nga eleksyon sa Mayo ug wala apila si kanhi mayor ug karon Konsehal Arlene Zambo nga usa usab sa nakapahimus sa programa.

Sigon ni de la Cerna si Garcia nipasaka og kaso batok kang Zambo niadtong 1998 gumikan sa susamang isyu apan karon, wala na kini apila sa bag-ong reklamo kay managsama sila og partido, ang One Cebu kansang national party kay Partido Demokratiko Pilipino - Lakas ng Bayan (PDP-Laban).

“So, will see here the deliberate attempt to besmirch all the candidates of the other side while keeping to himself the candidates that are allied with him,” sigon sa abogado.

Apan depensa ni Garcia nga kon sa pagtuo ni Osmeña angayan iapil si Zambo ug duna kini mga dokumento nga mopamatuod niini, iya kining giawhag nga moduso og reklamo sa Ombudsman batok niini.

Si de la Cerna nidugang nga dili lang ang mayor ang angay basulon tungod kay bisan ang mga konsehal ug mga opisyal sa kabarangayan ang apil sa programa ug maoy ni-hire sa mga tawo nga maoy manilhig sa karsada, mangolekta sa basura ug ubang kalihokan kabahin sa Clean and Green programa.

/ ALEX BADAYOS ■ MODELO NGA KAWANI: Modelo sa pagka matinud-anon ug ehempo alang sa ubang kawani si Karl Hanes Codilla (tuo), house keeping personnel sa Nationalwide Development Centralized Company (NDCC) manpower agency nga nadistino sa Gaisano Capital sa Barangay T. Padilla, dakbayan sa Sugbo, kinsa nakakita og pitaka nga dunay sud nga P28,369.25 ug gold necklace. Kini iyang gitug-an sa opisyal sa kompaniya nga gitrabahoan ug ilang gi-turnover sa SunStar Cebu kagahapon, Marso 14, aron ipahibalo sa publiko apan samang adlaw, gi-claim na kini sa tag-iya nga si Uldarico Giltendez sa buhatan ning mantalaan.