Incentives ihatag: Magpale
Madawat ra gihapon sa mga barangay worker sa lalawigan sa Sugbo ang insentibo gikan sa kagamhanan sa lalawigan sa Sugbo nga napakyas sa pagkuha niini atol sa gieskedyul nga adlaw sa distribusyon sa ilang lungsod o siyudad.
Apan matod ni Bise Gobernador Agnes Magpale nga dugay pa kini makuha sanglit kinahanglan pa nga tiwason una ang distribusyon sa nahabilin nga mga lungsod nga wa pa makadawat sa ilang insentibo.
Siya nipasabot nga kinahanglan ma-liquidate una sa Provincial Health Office (PHO) ug Provincial Treasurer’s Office (PTO) ang tanang barangay workers nga nahatagan ug ang nauli nga kwarta sa mga wala makakuha.
“It’s going to be a tedious process, maghimo na sad og laing payroll. But it will take long kay tiwason pa man ang tanan, unya iuli to tanan nilang kuwang,” sigon ni Magpale.
Matod ni Ainjeliz de la TorreOrong, pangu sa Provincial Information Office, kinahanglan nga ma-liquidate dayon ang financial incentives sanglit gikuha kini gikan sa cash advance nga transactions aron makakuha na usab og laing cash advance ang PTO alang sa mosunod nga LGU nga hatagan. Ug nag-apas usab sila nga dili maabtan sa election ban sa Commission on Elections.
“Tanang sobra ihapon na nila, pila ang nakadawat, pila ang wala. Ibalik sa PTO nga moihap kon sakto ba ang lista ug ang kwarta nga nabalik,” pasabot ni Orong.
Sumala ni Magpale nga dili lang ang mga taga lungsod sa Liloan ang wala makadawat sa insentibo.“I can say without batting an eyelash, wa jud mi namulitika,” pagtataw ni Magpale.
Atol sa press conference sa iyang buhatan pagka Huwebes, Marso 14, ang bise gobernador namahayag nga nisuwat si Provincial Administrator Atty. Mark Tolentino kang Liloan Mayor Christina Garcia-Frasco pinetsahan og Pebrero 27, 2019 nga nadawat sa buhatan sa mayor pagka Marso 5, nga nagpahibawo sa mahitabo nga distribusyon pagka Marso 8.
Matod ni Magpale ang mayor gisuwatan aron mopahibawo sa mga opisyal sa kabarangayan apan nahibung sila kon nganong one third lang sa covered court sa Liloan ang na-occupy sa mga barangay worker.
Sigon ni Frasco wala gisulti sa suwat nga siya giimbitar, dili sama sa miaging tuig nga siya gipaapil sa distribusyon isip maoy mayor sa Liloan diin siya ug iyang kaubang elected nga mga opisyal ang nitambong.
"And it is not true that my office officially received the letter they are now spreading on social media," matod ni Frasco.
“Karon na panahon na sa eleksyon, ang ila nang mga kandidato naa didto, sa ilang piniling barangay, ug wala na taga-i ang mga wala nang-attend. Si Magpale ang klarong namulitika kay iyang gipalabi ang iyang rally sa buluhaton sa mga barangay workers alang sa kahimsug ug kahapsay sa Liloan," matod ni Frasco.