Simpatiya og pagkondenar
Grabe ang simpatiya nga gipadangat sa publiko nunot sa niluog nga kamatayon ni Christine Lee Silawan, ang 16 anyos nga dalagita, kinsa brutal nga gipatay niadtong Lunes sa kaadlawon sa sitio Mahayahay, barangay Bangkal, Lapu-Lapu City. Sa samang higayon, grabe usab ang pagkondenar sa katawhan ngadto sa naghimo sa krimen. Ingon ani ang reaksiyon sa publiko kay brutal ang kamatayon sa maong dalagita.
Gani ang Malakanyang mipakita man og interes ning maong kaso. Mimando sa kapulisan dinhi sa rehiyon nga imbestigahon kini og tarung aron madala sa husgado ang mga mamumuno ug mahatagan og hustisya ang biktima.
Mokabat na usab ngadto sa P1.8 milyones ang ganti nga ihatag ngadto kang bisan kinsa nga makahatag og inpormasyon kabahin sa mga killer. Kining pagtanyag og ganti dako kaayo’g ikatabang sa daling kasulbaran sa kaso.
Ang Police Regional Advisory Council mitanyag og P100,000; ang Lapu-Lapu City government pinaagi ni Mayor Paz Radaza mitanyag og P1 ka milyon; ang Provincial Board migahin usab og P200,000 samtang usa ka retiree nga US citizen nga atoa magpuyo sa Ormoc City nga si Don Davis mitanyag usab og P500,000. Posible nga mapun-an pa ni.
Kinsa man gyud kaha ang nagpatay sa dalagita? Mora man og ‘halimaw’ ang nagpatay kaniya. Tiaw ba nimo kanang gilaplap ang panit sa nawong, gikuha ang dila, ubol-ubol ug dunggan unya 30 ka mga samad dinunggaban. Mora man og naglagot og maayo ang kriminal o mga kriminal. Matod pa ni Lapu-Lapu City Police Office chief Limuel Obon nga ila nang nailhan ang usa sa mga mipatay kang Christine.
Wanted kuno nga adunay kasong murder ug ‘armed and dangerous’ ang usa sa mga suspetsado. Posible bang adunay relasyon sa biktima ang akusado? Kay matod pa nakita sa CCTV footage nga gipasakay ang biktima og motor nga wa pugsa. Buot ipasabot nga kagustuhan sa biktima nga mokuyog ug kay boluntaryo man nga mikuyog ,posibleng kaila sila. Dako kining hagit sa atong kapulisan ang pagsulbad ning brutal nga pagpatay sa dalagita labi pa kay ang publiko ug Malakanyang mipakita og interes niini.