STL way ayo
Midimitir sa iyang katungdanan ang Philippine Charity Sweepstakes Office (PCSO) General Manager Alexander Balutan tungod suma pa sa personal nga rason.
Apan nasayran nga napugos siya sa pag-resign tungod sa pagtidlum sa kita sa PCSO. Ang ilang nag-unang tinubdan sa salapi mao ang pagpamaligya og sweepstakes tickets, Lotto/swertres/keno ug ang franchise fee gikan sa Small Town Lottery (STL).
Ang gitangtang nga Philippine Charity Sweepstakes Office (PCSO) general manager napakyas usab sa pagkolekta sa P4 bilyones gikan sa authorized agents sa Small Town Lottery (STL).
Mao kini ang finding sa Commission on Audit (COA) niadtong 2017. Suma sa report nga ang PCSO wala makakobra sa 71 ka Authorized Agent Corporations (AACs), nga maoy nag-operate sa mga STLs sa tibuok nasud. Ang mga franchise diay sa STL mokabat og P50 milyones.
Diha usay mga kontrata nga mi-expire na apan gi-renew lang kini sa mga opisyal sa PCSO nga wa i-agi og bidding. Daghan usab nga mga STL operator nga wala makakuha sa ilang quota apan gipasaylo lang sa PCSO. Mao kini usa ka dakung katarungan nga miminus ang kita sa maong buhatan.
Grabe usab ang pagminus sa halin sa lotto, swertres ug keno. Akong gibalikbalik pagpahibawo nga wa gayud makatabang kining STL sa panudlanan sa gobiyerno hinunoa mao kini ang nakapagrabe sa iligal nga sugal nga masiao dinhi sa Sugbo. Kinahanglang sirhan na kining STL dinhi kay wa kini ayo.
Maka-uuwaw kining gihimo sa mga kongresista nga pag-suksok og mga gahin nga minilyon alang sa ilang mga proyekto bisan kon natapus na ang desisyon sa bicameral conference committee.
Ang usa gud ka balaudnon nga mapasar sa Kongreso ug sa Senado kinahanglang moagi sa bicameral conference committee aron matakdo ang wala magkasinabut nga bersiyon sa duha ka balay-balauranan.
Human niini ibalik kini sa Kongreso ug sa Senado aron kini makompirmar usa i-imprinta ang final version sa maong balaudnon nga maoy isumiter ngadto kang Presidente Duterte. Mahimo kining balaud kon mapirmahan na sa presidente.
Apan anaa gihapoy gahum ang presidente pag-veto sa pipila ka items nga dili niya magustohan. Kon dili kini aksiyonan sa presidente sud sa napulo ka adlaw, kon nag-session ang kongreso, automatic kining mahimong balaud.
Kining gihimo sa mga kongresista nagpakita lang sa ilang kahakug. Klarong iligal kining maong buhat. Si Senate Pres. Tito Sotto misaad nga dili siya mopirma niining maong General Appropriations Act 0f 2019 kun budget. Ambut og unsay reaksiyon ni House Speaker Gloria Macapagal Arroyo nga usa usab sa mga mopirma niini?
Napikal na ang presidente sa panagbingkil sa mga senador ug mga kongresista nga maoy nakalangay sa maong budget. Gipaabut nga ang budget sa miaging tuig ang gamiton hangtud mapirmahan sa presidente ang General Appropriations Act of 2019. Dili kini makaayo sa pagpadagan sa gobiyerno. Apan maayo hinuon kay misaad ang presidente nga dili siya mopirma og iligal nga dokumento.