Linuog nga pagpatay, buhat sa kulto?

Usa ka kulto kaha ang nagpaluyo sa linuog nga pagpatay kang Christine Lee Silawan, 16 anyos nga estudyante sa Grade 9 sa Barangay Bangkal, Lapu-Lapu City? Ang iyang patay’ng lawas nga may 30 ka samad dinuggaban napalgan sa alas 6 sa buntag sa Lunes, Marso 11, didto sa usa ka bakanteng luna sa sitio Mahayahay sa maong barangay.

Nigawas ang mga huhungihong nga usa ka kulto ang nagpaluyo sa maong pagpatay kay ang iyang nawong gipanitan hangtod sa bukog. Wa na ang iyang dila, ubolubol ug tuong dunggan, sumala pa ni Col. Benjamin Lara, medico legal officer sa PNP Crime Laboratory nga maoy nag-autopsy sa lawas ni Christine.

Unsa kahay gibuhat sa mga mamumuno sa mga bahin sa lawas ni Christine nga ilang gilaplap? Sumala sa mga huhungihong nga wa pa matino hangtod karon, adunay kulto kansang ritwal naglakip sa pagkaon sa bahin sa lawas sa tawo nga ilang gilaplap.

Si Col. Lara niingon nga hayan nga gituyo sa mga killer ang pagkuha sa maong mga parte sa lawas ni Christine aron malangay ang mga pulis sa pag-ila sa biktima ug makahigayon pa sila sa pagtago.

Matod niya nga maayong pagkapanit ang biktima kay nadala hasta ang unod ingon man ang pagkuha sa tutunlan ug dila. Sila gani nga maghimo sa autopsy maglisod pa sa pagkuha sa maong mga parte sa lawas ug sa pag-abli sa panit sa ulo sa tawo.

Niingon si Col. Lara nga karon pa siya makasugat sa maong brutal nga krimen. Ang naghimo niini, matod pa niya, kahibawo gyud nga mohiwa tungod sa kalimpyo sa agi niini.

Adunay ganti nga P1.8 milyones alang niadtong makatudlo sa tulo ka mga mamumuno ni Christine. Si Col. Limuel Obon, director sa Lapu-Lapu City Police Office (LCPO), niingon nga nailhan na nila ang usa sa tulo ka mamumuno sa biktima.

Ang suspek gihulagway ni Obon nga “armed and dangerous,” adunay pending warrant of arrest sa kasong murder ug usa sa mga most wanted sa Kabisay-an. Dakpon nila buhi, kon mahimo, aron masayran ang misteryo sa maong brutal nga krimen.

Susihon usab ni Obon kon ang brutal nga pagpatay kang Silawan adunay kalambigitan sa pagpatay sa usa ka mag-uuma didto sa Danao niadtong Enero diin ang biktima gipanitan usab ang nawong.