Till there was you

Nakahunong ko pagkaon pagkakita ko sa usa ka lalaki nga bag-ong misulod sa nahimutangan kong fast food sa uptown. Buntag karon ug mao pay pagkahuman nakog jogging. Every Sunday morning moanhi gyud ko sa circle sa Fuente Osmeña aron pag-exercise pinaagi sa pag-jogging.

Kinaiya ko na kini since sa akong pag-eskuwela sa hayiskol. Karon, third year college na ko. Ug sa di pa ko mopauli, mamahaw una ko sa McDonald’s. Kalit kong gikulbaan. Mitan--aw nako ang lalaki. Mora sab siyag nakalitan. Unya, mi-smile siya. Wa gyud ko masayop. Siya gyud. Gipahiyoman ko sab siya.

Nagdali siyang miduol nako. Nagtindog siya sa akong atubangan.

“Wenna?”

“Fidel?”

Nagdali kong mitindog ug gigakos ko si Fidel. Migakos sab siya nako. Nagkinataw-anay mi. Unya nag-aper mi si Fidel.

“Daghan tag estoryahan, Wenna. Moadto una ko sa counter. Mag-order ko sa akong pagkaon.” “Sige.”

Mibalik kog lingkod ug gisundan ko pagtan-aw si Fidel. Three years na ming wa magkita. Sa akong tan-aw niya karon, misamot siya kaguwapo. Klasmet mi gikan sa first year high school hangtod na sa among pag-graduate. Nagkalagyo mi dihang nag-eskuwela na mi sa college. Gidala siya sa iyang mga ginikanan sa Davao, kay taga Davao man ang iyang amahan. Didto na motungha si Fidel sa college.

Wa mi communication sukad sa among panaglagyo kay wa man mi selpon. Hinuon, karon nga college na ko, gipalitan na kog selpon ni Papa. Tingali, mao sab si Fidel.

Nagsige mig pahiyomay si Fidel samtang nagkaon na mi. Mao pa man guy pagsugod nakog kaon dihang nahiabot siya.

“Three years. Long years para nako, Wenna, nga nahilayo ka nako.”

“Wa man sab ko kalimot nimo, Fidel. Pero wa na man ta, di ba?”

Miseryuso si Fidel. Moseryuso sab ko. Mitando siya.

Mikatawa ko. Mikatawa sab si Fidel.

“Memories is always memories.”

“Bitaw.” Dayon kong inom sa akong Milo.

Nakita mo na tingali ang imong true love sa Davao, Fidel?”

Nahilom si Fidel. Miinom siya sa iyang drinks.

“Bitaw, no, Fidel, nganong maghisgot man ta ana? Lain ang atong hisgotan.”

“Good suggestion, Wenna.” Nagkinataw-anay na sab mi. Nagpakisusi ko kang Fidel kon nganong nia siya karon sa Cebu.

(SUMPAYAN)