Negusyanteng gi-ambush may hulga na: pulis

Kapulisan sa lungsod sa Liloan padayon sa ilang imbestigasyon kong kinsa ang nagbanhig patay sa usa ka tag-iya og salon pasado alas 6:55 sa Martes sa gabii, Marso 13, samtang sakay sa iyang sakyanan.

Ang biktima giila nga si Celso Jamelo, 63,taga Jims Ville Subdivision, Barangay Tayud, lungsod sa Liloan.

Patay na siyang gidala sa Mendero hospital sa lungsod sa Consolacion tungod sa mga samad pinusilan nga naangkon.

Siya gikan sa usa ka convenience store sa sitio Ka Pulay, Barangay Tayud, pipila ka metros lang ang gilay-on sa iyang salon.

Niabot ang duha ka wa mailhing mga lalake nga sakay og motorsiklo ug dayong pamusil sa makadaghang higayon gamit ang wa pa matino nga kalibre sa armas.

Ang mga killer gihulagway nga nagsul-ob og yellow nga sweat shirt ug human sa pagpamusil dali ning misibita paingon sa bag-ong dan sa barangay Yati, lungsod sa Liloan.

Matod ni police Chief Insp. Danilo Colipano, hepe sa Liloan police station, nga padayon pa ang ilang imbestigasyon apan dako ang posibilidad nga bangi sa negosyo ang hinungdan.

Sa milabay nga mga adlaw nakadawat si Jamelo og hulga sa kinabuhi tungod sa ilang negosyo nga maoy gisubay sa mga imbestigador.

“Naay gisulti ang asawa. But so far we cannot divulge the information para di ma preempt. Based sa information kabahin sa business ang pagpatay,” matod ni Colipano.

Tan-awon pa usab nila ang mga kuha sa CCTV camera sa dapit kon nakuha ba ang pagpamanhig.