Krusyal nga sangka sa Bolts, Rain or Shine

Krusyal nga panag-engkuwentro ang sagubangon sa Rain or Shine Elasto Painters ug sa Meralco Bolts sa ilang panag-abot karong gabii ning nagkainit nga elimination round sa PBA Philippine Cup nga ipahigayon sa Cuneta Astrodome.

Ang Rain or Shine nga nasugamak og kapildihan sa uwahing duha ka mga duwa niini, ang mosuway og pataas sa ilang baraha ngadto sa 8-3 nga baraha nga maoy maghatag kanila og kahayag nga maangkon ang twice-to-beat nga insentibo sa quarterfinals.

Sa ilang bahin, ang Meralco Chargers ni coach Norman Black, nagtinguha nga makatikang na usab og laing ang-ang nga maghatag kanila og luna alang sa sunod panid. Sa kasamtangan, dala ang 3-5 nga record, anaa sila sa ikanapulo nga puwesto apan sikit kini nga nakiglum- ba sa sister team NLEX Warriors (3-5) ug sa Columbian Dyip (4-6) alang sa ikawalo ug katapusang lingkuranan sa playoffs.

Kon mapildi nila ang Bolts, hayag ang kahigayonan nga makahulbot og puwesto ang Painters sa Top Two pinaagi sa superior quotient. Hugot nilang ikakopetensiya sa top two slot ang San Miguel Beer (6-3), TNT KaTropa (5-3) ug Barangay Ginebra (4-3).

Ang panagsangka sugdan sa alas 7 sa gabii.

Samtang ang pagbangon gikan sa sunodsunod nga pagkapukan maoy anaa karon sa alimpatakan ni Alaska coach Alex Compton sa ila usab nga pagpakigbatok sa TNT KaTropa sa alas 4:30 sa hapon.

Dili lang kay nahingawa si Compton sa ilang kapildihan kon dili ang bati nga duwa sa iyang mga batos maoy usa sa iyang gikabalak-an karon.

Sukwahi sa Alaska, ang KaTropa ni coach Bong Ravena anaa karon sa saktong pahuway, ug puntariya usab kanila nga motapos sa elimination round nga magbawon nga twice-tobeat advantage.