ENGKUWENTRO SA MGA KAMPIYON
Talisay City batok Minglanilla sa Gov's Cup karong gabii
Panagtigi sa mga kampiyon maoy masaksihan karong gabii sa dihang mobalik ang aksyon sa ikatulong edisyon sa Cebu Governor’s Cup Inter-cities/municipalities 21-under basketball tournament nga motabok sa Municipal Gym sa Sibonga, probinsiya sa Sugbo.
Ang defending champions Talisay City Aquastars, ang team nga wala pa makaangkon og kapildihan sa tournament sukad sa niaging tuig, mosakbang sa Minglanilla Archangels, ang unang team nga nakampiyon sa Governor’s Cup, sa alas 6 ang takna.
Gihulagway nga ang maong panagsangka maoy magsilbing championship preview sa 1st Congressional District Division.
Anaa man tuod nila ang pabor, apan alang ni Talisay coach Rey Michael Gurrea nga way luna sa paglugway sa ilang habig ilabi na batok sa Minglanilla nga may igo na usab nga kasinatian.
Sa opening day niadtong Marso 9 nga gipahigayon sa Talisay City Sports Complex, ang Aquastars yanong mipukan sa Sibonga, 96-66, samtang ang Minglanilla mibuntog sa San Fernando, 73-69.
Kadto maoy ika-23 nga sunodsunod nga kadaugan sa Aquastars, lakip na sa niaging Gullas Cup diin ilang giharos ang tanang mga duwa hangtod na sa championship game.
Sa laing duwa, magtakos usab ang San Fernando ug Carcar City sa first game nga sugdan sa alas 4:30 sa hapon.
Ang duha pulos nangapukan sa opening day.
Sa 2nd District division, ang host Oslob, nga napildi sa Argao, 59-63, sa opening day, mosuway og bakwi sa ilang kapildihan pinaagi sa pagpakigsangka sa Santander sa main game.
Ang Argao makigsangka sa Samboan sa alas 4;30 sa hapon, samtang magtakos usab ang Boljoon ug ang Alcoy sa alas 6 sa hapon.
Sa 3rd District, ang Tuburan nga gipatapsingan sa Balamban, 76-77, niadtong Sabado mosulong sa Barili karong gabii sa alas 6 ang takna.
Ubang mga duwa karon:
4th District: (Tabuelan Municipal Gym)
4:30 pm. - Madridejos vs. San Remegio
6:00 pm. - Medellin vs. Bogo City
7:30 pm. - Tabuelan vs. Santa Fe
5th District: (Borbon Municipal Gym)
6:00 pm. - Carmen vs. Sogod
7:30 pm. - Borbon vs. Catmon
6th District: (Mandaue City Sports Complex)
6:00 pm. - Mandaue City vs. Consolacion
7th District: (Alcantara Municipal Gym)
6:00 pm. - Dumanjug vs. Moalboal
7:30 pm. - Alcantara vs. Ronda