WARRIORS MIPAKGANG SA ROCKETS

Durant wa ka duwa tungod sa injury

Wa man tuod ang usa sa ilang pambato nga si Kevin Durant, apan ang Golden State Warriors nakahimo gihapon sa pagpakgang sa siyam nga sunodsunod nga daog sa Houston Rockets, 106-104, sa nagpadayon nga National Basketball Association (NBA).

Si Klay Thompson mipakatap og 30 puntos, midugang si DeMarcus Cousins ug 27 puntos nga maoy iyang season-high alang sa Warriors kinsa gipakaging sa Phoenix Suns niadtong Dominggo. Kadto mao usab ang ilang unang daog batok sa Rockets sa karon nga season sulod sa upat ka duwa.

Wa makaduwa si Durant tungod sa angol niini sa iyang tuo nga tikod atol sa ilang kapildihan sa Suns.

Hinuon ang Golden State pabiling naghupot sa liderato sa Western Conference standings ug labaw kinig upat ka daog sa Houston kinsa nakigsa sawo karon sa Oklahoma City sa ikatulong puwesto sunod sa Denver Nuggets.

Human naggukod og 14 puntos sa fourth quarter, ang tres ni Chris Paul sa nahabiling 10.8 segundos ang nakapasikit sa Houston. Gitubag hinuon kini sa duha ka free throws ni Stephen Curry sa katapusang otso segundos, 106-103.

Sa paghibalik sa bola, nakakuha unta og foul si James Harden, apan nasipyat ang ikaduhang free throws ug na rebound ni Andre Iguodala kinsa mao na misiguro sa kadaugan.

Si Harden nangulo sa Rockets nga may 29 puntos ug 10 ka assists, apan duha ray napasulod niini sa iyang 12 ka itsa sa three-point area.

Mitapos sa duwa si Curry nga may 24 puntos alang sa Warriors.

Nagkinahanglan na lang si Curry og sais puntos aron mamahimong ikalimang player sa kasaysayan sa Golden State nga nakatigom og 16,000 puntos. Si Eric Gordon mitapo og 17 puntos alang sa Rockets.

Mobisita ang Warriors sa Oklahoma City karong Sabado (Dominggo sa Pilipinas) sa ilang ikaupat nga pagsulong sa korte ilang kontra samtang ang Rockets mo-host sa Phoenix Suns ugmang adlawa.

Samtang, gipugnit ni Russel Westbrook ang iyang ika26 nga triple-double sa karon nga season human gipukan sa Oklahoma City Thunder ang Brooklyn Nets, 108-96.

Si Westbrook mipakli og 31 puntos, milangkat og 12 ka rebounds, mipakatap og 11 ka assists ug sa kinatibuk-an kini maoy iyang ika-30 nga triple-double sa iyang career. Midugang og 25 puntos si Paul George alang sa Thunder. / JBM

/ AP ■TAPAL: Limpiyong natapalan ni Klay Thompson (11) sa Golden State Warriors si Eric Gordon sa Houston Rockets (10) niining aktoha atol sa ilang duwa kagahapon sa NBA. (AP) Si Thompson maoy nangulo sa unang kadaugan sa Warriors batok sa Rockets kinsa mipukan kanila og katulo ka higayon sa karon nga season.