Rama absuwelto na?
Ang wala paglakip ni kanhi Cebu City mayor Michael Rama sa mga gipanghinganlan ni Presidente Rodrigo Duterte sa mga pulitikong may kalambigitan sa pagpakatap sa gidiling drugas dinhi sa nasod naghatag og dakong katin-awan sa bansagon sa kanhi mayor. Sa ato pa, posibling nasaypan lang si Rama o kaha dunay nagbinuang kaniya aron malakip siya sa lista nga nakigkumboya sa mga drug personalities nga una nang gibutyag sa presidente niadtong 2016.
Sa pagtumaw sa iyang pangalan, gipiyestahan gilayon kini sa iyang mga kaatbang sa pulitika ug mga kritiko nga daw maoy nakapalusno sa iyang pulitikanhong karera.
Apan taliwala niining tanan, wala mawad-i sa paglaom si Rama ug gihimo niya ang tanan aron malimpiyohan ang iyang pangalan. Gusto siyang makig-atubang sa presidente.
Tuod man, dunay pipila ka mga hulagway nga mikatap sa social media nga nagkahimamat ug nagtapad sila sa presidente, apan niadtong higayona, daw og sa way motuo kaniya kay laig wa may direkta nga pamahayag gikan ni Duterte.
Pero niadtong Huwebes, Marso 14, sa 82 ka mga pangalan sa mga narco-politicians nga giyagyag ni Duterte, duha lang ka mga Sugboanong pulitiko ang nahinganlan.
Kini mao sila si Daanbaantayan Mayor Vicente Loot, kinsa dugay nang gilungot-lungotan sa Presidente, ug San Fernando Vice Mayor Fralz Sabalones, igsuon sa mitahan ug miangkon nga drug lord nga si Franz Sabalones. Wala na ang ngan ni Rama.
Sa laktod nga pagkasulti, naabsuwelto ang kanhi mayor sa unang pasangil batok kaniya.
Apan wa kini magpasabot nga mohunong ug motuo na ang iyang mga kritiko ug kaatbang sa pulitika.
Gusto gihapon kining magpabilin ang lama sa pangalan ni Rama, uban sa pangindahay nga kini magamit nilang isyu sa umaabot piniliay.