Nag-alindasay si Sonny
Dihay higayon nga duhay mayor sa Toledo apan gigutom ang mga kawani kay walay sweldo. Si Mayor Sonny Osmeña gisuspenso sa Ombudsman og usa ka tuig sa Sept. 14, 2017 gumikan sa kapakyas paghatag og bahin sa real property tax sa Daanglungsod nga P17.7 million sa 2014. Apan ang Court of Appeals nga gidangpan ni Osmeña mibalit-ad sa hukom sa Ombudsman sa Mayo 2018 hinungdan nga mibalik paglingkod sa katungdanan. Wala manaog si Acting Mayor Tony Yapha kay wala may mando gikan sa DILG nahadlok nga pasakaan og abandonment of post. Maong duhay mayor ang Toledo. Polos sila nangangkon nga maoy mayor. Sept. 14. 2018 nag-rally ang mga regular ug job order employees kay walay sweldo gumikan sa kalibog kinsay mopirma sa pagpagawas og pundo. Hangtod nga ang DILG mitudlo ni City Administrator Ferdinand Marquez nga maoy mopirma hinungdan nga naluwas ang giuhaw ug gigutom nga mga kawani.
Kahinumdoman hilabihang suora nga daw gikapolot ang politikanhong panaghiusa nila ni Osmeña ug Yapha. Apan karon higpit nang kaaway sa politika. Sa sayo pa si Acting Mayor Yapha gipasakaan og kaso sa konseho 10 ka administrative complaints ngadto sa Ombudsman gumikan sa pagtudlo ni Atty. Terry Largo isip legal officer human wala aprobahi ang appointment.
Nag-alindasay na sab si Osmeña sa saad nga libreng tub- ig kon mapili nga kongresista. Mao man gani nga nakalingla sa taga-Toledo pagdagan og mayor kay maoy gipasalig panahon sa pagpangampanya. Dakong bakak ug paglipat-lipat kay unsaon pagkabuhi ug pagmintinar sa water district kon librehon ang tubig. Iyang gihimo sa Toledo kay mayor man siya apan ang resulta pwerti nang dakoa ang utang sa Toledo ngadto sa water district. Libreng tubig pero walay agas.
Si Osmeña maoy gipasabot ni Gaye Yapha nga mitanyag kaniya og P50 milyones aron mosibog sa iyang kandidatora. Lain sab tong bahad nga nanghulga kaniya. Nagpasabot nga wa gyoy dag-anan si Osmeña kay nabuak ang oposisyon. Sa kasaligang survey gikan sa masig ka habig 70 porsento ang kang Pablo John Garcia ug ang nahibiling 30 porsento gitunga nila ni Osmeña ug Yapha. Ang pagpa-withdraw ni Yapha mao ray paagi ni Osmeña nga mosaka-saka siyag gamay. Pildihonon gani siya sa Toledo kay sa 38 ka mga kapitan 22 kanila mipadayag nag suporta ni Pablo John ug One Cebu. Apan dili kakompyasahan si Osmeña kay giingong gigamit ang pundo sa clean and green sa Toledo. Kasong plunder ang sagubangon nga naglambigit og 210 million pesos nga gitikasan ang kagamhanan. Nangasuko na gani ang taga Toledo kay ila mang salapi ang gipanghaylo sa distrito. Nagduhiraw si Osmeña sanglit nagnihit na ang iyang lider sa ikatulong distrito.