Death penalty gustong ibalik

Nagbaha ang simpatiya alang sa pamilyang Silawan kansang anak nga si Christine biktima sa linuog nga krimen.Ning akong pagsulat padayon pa ang hot pursuit operation sa otoridad batok sa mga suspetsado.

Traynta ka samad dinunggaban sa nagkadaiyang bahin sa lawas ang nahiaguman sa biktima. Ang mga netizen nipadayag sa ilang grabing kasuko ngadto sa mga way puangod nga suspek.

Daghan ang nisiyagit nga kamatayon sab ang angay ipahamtang kanila. Gumikan niini nabanhaw ang isyu sa death penalty nga gusto nilang ibalik pagpatuman.

Duna sab hinuoy mga magbabalaod ang nipadayag og sukwahi nga baruganan labot sa maong isyu.

Sanglit panahon karon sa pangampanya makalaum kita nga nas moinit pa og maayo kining maong isyu.

Sa pikas nga hangtod gahapon nisaka na ngadto sa duha ka milyon ka pesos ang salapi nga gitagana isip ganti niadtong makahatag og inpormasyon nga moresulta sa pagka sikop sa mga kriminal.

Akong panghinaot nga ang tinuod gyud nga mga kriminal ang masikop. Lisod na kong lain ang madakpan ug magngisi ang ang mga tinud-anay nga kriminal sa bangis nga krimen.

Ang publiko dako og matampo sa kasulbaran ning maong kaso. Apil na ang mga pamilya sa mga kriminal.

Kong sa ilang kaugalingon di makadawat sa gihimo sa ilang kabanay ato silang hangyoon pagdangop sa kapulisan og itug-an ang ilang mga nasayran. Imposibli nga wa pa mahibalo ang kabanay sa mga suspek sa maong krimen.

Nilanat na og pipila ka adlaw human nahitabo ang labing brutal nga krimen sa atong panahon. Samtang ang mga imbestigador naniksik og mga inpormasyon basin naa moy gitagoan diha nga kasayuran.

Ayaw na tan-ugi sa ngalan sa hustisya ug kaangayan. Sa pamilyang Silawan sakto ang inyong panawagan nga unta magbaton sab og respeto kining mga naghatag og di maayong komento labot sa krimen.

Samot na niadtong mga nagpakatap og sayop nga inpormasyon diha sa social media.

Ako nisalig sa katakus ni Col. Limuel Obon pagsulbad ning maong krimen.

Apan kong way kooperasyon sa publiko nahisama ra gihapon ni sa mga nangaging patay nga wa pa masulbad hangtod karon.

Tua na lage naghisgut na og kanihit sa tubig ang mga molopyo sa dakbayan og lalawigan sa Sugbo.

Pastilan kong di maghuwaw way mangutingkay nganong pabiling bati ang programa sa gobyerno labot sa patubig.

Ang tubig nga labing batakang panginahanglan natong tanan daw giyamayamaan lang.

Niadtong panahon sa tingulan wa gyuy nakahunahuna pagsipong sa tubig pangandam sa emerhensiya.

Unta to ang mga basketball court maoy gikawtan aron pabarugon ang mga pundohanan sa tubig nga gikan sa ulan.