CEBU MOSUWAY’G BAWOS SA DAVAO

Mosuway pagbawos ang Cebu City Sharks batok sa Davao Occidental Tigers sa ilang panagharong sa premirong duwa karong gabii sugod sa alas 7:00 ang takna sa Game 2 sa ilang 1st round playoffs bestof-three series sa Southern division sa Maharlika Pilipinas Basketball League (MPBL) 2019 Datu Cup sa Lagao gym sa General Santos City.

Sa main game, ang host General Santos Warriors nagtinguha sab nga makabawos sa Bacoor Strikers sa Game 2 sa kaugalingon nilang series.

Ang Sharks nasugamak sa 67-82 nga kapildihan sa Game 1 nga gipahigayon sa korte sa Tigers sa Huwebes sa gabii.

Sa Game 1, ang Sharks nakamaneho pa pagposte og 10 puntos nga labaw sa 1st quarter bisan wala ang labing sinaligan niini nga si Patrick Cabahug, kinsa adunay angol sa iyang wa nga tiil.

Apan sa pagpadayon sa kombati, mianinaw nga nakabintaha og dako ang puwersa sa Tigers hilabi na dihang nanginit na’g sugod ang ilang mga kanhi magduduwa sa Philippine Basketball Association (PBA) nga sila si Mark Yee, Bonbon Custodio ug Leo Najorda.

Ang Tigers, nga maoy No.1 team sa Southern division, gipangulohan ni Yee pinaagi sa iyang 20 puntos, nitampo og 18 puntos si Custodio samtang nihatag og 11 puntos si Najorda.

Ang Sharks, nga maoy No. 8 sa South, gipangulohan ni Rhaffy Octobre pinaagi sa iyang 16 puntos, nihatag og 12 puntos si William McAloney samtang nitampo og walo ka mga puntos si Victor Nunez. Sa wala pa nagsugod ang

series, giangkon nang daan ni Sharks coach Titing Manalili nga grabe ka lisod nga tahas alang kanila ang pagbuntog sa Tigers hilabi na nga wala si Cabahug, kinsa maoy ilang labing sinaligan sa three-point shooting.

Apan gipaneguro ni Manalili nga dili sila bastabasta moisa sa ilang bandera hangtod nga aduna pa sila’y kinabuhi sa torneyo.