LEBRON, LAKERS NAPILDE NA SAB

Misamot ang kalbaryong gipas-an ni LeBron James ug sa Los Angeles Lakers kabahin sa ilang poruhan sa playoffs human sila nasugamak sa laing kapildihan batok sa host Toronto Raptors, 111-98, kagahapon sa National Basketball Association (NBA).

Sa kapildihan, ang Lakers ming-unlod sa 31-37 nga rekord ug nagpabilin kini sa ika-11 nga dapit sa Western Conference.

Wala pa man tuod sila opisyal nga natagak apan ning puntoha, daw magkinahanglan na og milagro ang Lakers aron makaabante sa nagkaduol nga playoffs.

Gani sa sayong bahin ning buwana, daw nakasabot nang daan ang Lakers nga kuli na silang makasulod sa playoffs hinungdan nga ilang gilimitahan ang playing time ni James aron dili na mabun-og og insakto ang lawas niini ug mapreserba kini sa sunod nga season.

Taliwala nga giminusan ang iyang playing time, si James nakapakatap gihapon og 29 puntos aron pangulohan ang Lakers samtang nitampo og career-high nga 16 puntos si Alex Curso.

“It’s challenging for me mentally, because I’m so accustomed to being out on the floor, especially when I’m healthy,” matod ni James.

“This is the direction they wanted to go the remainder of the season, given the lack of success we’ve had with our ball club.”

Sa miaging upat ka mga duwa sa Lakers, wala na molapas og 33 minutos ang playing time ni James. Posibleng papahuwayon sab sa Lakers si James sa ilang duwa batok sa Detriot karong adlawa.

“With the injuries we have and with LeBron watching his minutes, we’ve got to get creative with some of our lineups and make sure we have groups out there that give us a chance to win still,” pasabot ni Lakers coach Luke Walton.

“Ultimately, we’re trying to get a win each and every time out.”

Sa kadaugan, napahugtan og samot sa Raptors ang ilang paggunit sa ikaduhang luna sa Eastern Conference dala ang 49-20 nga rekord sunod sa overall leader Milwaukee Bucks nga adunay 51-17 nga baraha.

Ang Raptors, nga nakaseguro nang daan og luna sa playoffs sama sa Bucks, gipangulohan ni Kawhi Leonard pinaagi sa iyang 25 puntos, niamot og 20 puntos si Norman Powell, nihatag og 16 puntos si Pascal Siakam samtang nitampo og 15 puntos si Marc Gasol.

Mao kini ang ikasiyam nga sunodsunod nga kadaugan sa Raptors batok sa Lakers gikan pa niadtong Nobiyembre 30, 2014.

Nahimo sa Raptors ang kadaugan bisan wala ang duha sa ilang mga sinaligan nga sila si Kyle Lowry ug Serge Ibaka.

Si Lowry adunay angol sa iyang tiil samtang si Ibaka nagserbisyo pa og tulo ka mga duwa nga suspensyon.

/ AP PHOTO ■ PILDE NA SAB: Nag-ilugay sa bola sila si Los Angeles Lakers forward LeBron James (23) ug Toronto Raptors forward Kawhi Leonard (2) ning aktuha sa usa sa mga aksyon sa NBA kagahapon. Napilde na sab ang Lakers ning duwaa nga nagpatiglom og samot sa ilang poruhan sa playoffs.