Bayranan sa simbahan

Gitan-aw sa simbahang Katoliko sa Sugbo ang posibilidad nga dili na magpabayad sa mga serbisyo sa kaparian sama sa misa sa paglubong og minatay ug pagbendita og mga sakyanan o panimalay.

“Ako, I foresee that as a good sign sa direction sa simbahan posible mahitabo. Pero depende how ready and how soon we educate the people,” matod ni Cebu Archbishop Jose Palma, pangu sa artsidyosesis sa Sugbo.

Pamahayag kini sa arsobispo human ang diyosesis sa Balanga, Bataan ang dili na maningil og bayranan sa mga misa sa lubong ug blessings sugod karong Abril 21.

Sa iyang circular letter pinetsahan og Marso 11, si Balanga Bishop Ruperto Santos nimando sa pagwagtang na sa maong mga bayranan gumikan kay gusto niya ipakita nga ang simbahan usa ka maamomahon nga inahan nga dunay kaluoy ngadto sa nagbangutan nga pamilya ug kabanay sa namatay.

Matod ni Palma, sa prinsipyo, kinahanglan sila mohatag og serbisyo sa katawhan labi na ang pagtudlo kabahin sa pagtuo ug relihiyon.

“Pero the other aspect is, ang mga tawo sayod man nga they also need to provide the needs of the clergy and how do we do that in actual practice?” pahayag ni Palma nga nahinabi sa mga tigbalita human gilusad ang Pagsangyaw 2021 niadtong Sabado, Marso 16, sa IC3 Convention Center.

Sigon niini ang kagustohan nga mawa na ang pagbayad sa stole fees, ang ubang mga layko gusto nga mosuporta sa kaparian nga ipaagi sa ilang regular nga paghatag og kontribusyon o donasyon. Ang stole fee maoy bayranan sa layko sa pari gumikan sa pagbuhat sa seremonyas sama sa paglubong ug uban pa.