3 ka adlaw gilatid alang sa local absentee voting

Tulo ka adlaw ang gihatag sa Commission on Elections ngadto sa mga sundawo, mga pulis ug ubang mga opisyal ug empleyado sa gobiyerno nga mag-duty sa mismong adlaw sa piniliay sa Mayo 13, aron makabotar.

Ubos sa Resolution No. 10443, ang Comelec nitakda sa local absentee voting karong Abril 29 hangtod sa Mayo 1.

Sumala ni acting Cebu Provincial Election Supervisor Atty. Jerome Brillantes ang

local absentee voting (LAV) maghatag og kahigayonan sa mga sundawo, pulis ug ubang mga empleyado sa kagamhanan nga makabotar sa laing lugar nga dili sila rehistrado apan, didto sila madestino, atol mismo sa adlaw sa eleksyon.

“...to exercise their rights to suffrage during election,” dugang niini dihang nahinabi sa mga tigbalita niadtong Biyernes, Marso 15.

Apil sa gitugotan sa LAV ang mga sakop sa media nga mga rehistradong botante usab nga makabotar og sayo sa dili pa ang Mayo 13.

Ang ilang botaran kay ang mga position lang sa pagka senador ug party-list.

Ang ilang pagbotar magsugod alas 8 sa buntag hangtod alas 5 sa hapon.

Ang mga opisyal ug kawani sa gobiyerno ingon man ang mga pulis ug militar adto mobotar sa voting centers nga gitakda sa ilang mga labaw.

Samtang ang mga sakop sa media, adto mobotar sa mga buhatan sa Comelec diin sila niduso sa ilang aplikasyon aron makasalmot sa LAV.

Niadtong Marso 11, Lunes, ang katapusang adlaw sa pagdawat sa aplikasyon alang sa gustong makaapil sa LAV.

Matod ni Brillantes, ang mga sundawo ug pulis didto nisang-at sa aplikasyon sa ilang mga buhatan ug ang maong mga ahensiya na ang moduso niini ngadto sa ilang ulohang buhatan.