Nagkainit na ang kampanya sa eleksiyon

Wa pa ang pormal nga pagsugod sa kampanya alang sa lokal nga piniliay pero grabe na nga nakapangampanya ang mga magpapili sa eleksiyon karong Mayo. Mao na man ni ang naandan. Wa ug tuo nga pulong pulong ang masaksihan nga ilang gipasiugdahan.

Ang maong paagi giisip nga usa sa labing epektibo nga paagi nga ilang mapadayag ang ilang mga plataporma ngadto sa mga botante. Hinuon karaan na kaayo ni nga paagi.

Pero nganong gisagop pa man gihapon sa mga politiko? Wa na ba silay nahunahunaan nga bag-ong diskarte? Sama anang hand shaking sa sayong kabuntagon. Wa pa gani tay hilam-os nagsige na og usig ang mga iro kay diay may nagpanon nga nisum-ok sa kabalayan og nanglamano sa mga molupyo.

Diha na ni kaniadto. Mga pilionon nga mapahiyomon kaayong motunol sa ilang mga kamot. May dala pang hagwa sa gikugos nga bata. Ang uban way tihik tihik nga mogakos sa mga tigulang.

Makaingon ta nga pagka nindotang tan-awon. Pagka sensiro. Pagka maayong tawo. Ang sakit nga kamatuoran kay mapili lang ang makamaong molingi sa ilang giagian human makalingkod sa katungdanan.

Kana bayang mga dapit nga ilang gisum-ok taliwala sa kalang-og sa tubig sa kanal, ang uban ana masugamak og demolition kay lage mga informal settlers man. Kong imo nang pangayoan og tabang aron ang demolition maangan angan sa pagpatuman hilaw o taphaw na kaayo ang tinagdan.

Pangutan-a nang mga biktima sa demolition kong pila na ka politiko nga nagsaoy saoy sa ilang dapit sa panahon sa kampanya. Ang di na kaayo bag-o nga ilang gisagop karon mao ang pagpabaha og mga nindot nga estorya gamit ang social media.

Propaganda nga usahay mahibung ka. Lahi ang dagway nga nagkatawa kay sa personal nga imong makita. Gi-edit na diay pinaagi sa ilang mga sinuholan nga eksperto ning paagiha. Pastilan kaalegri ning kinabuhia.

Mao diay magnihit usahay ang sensiyo nga papel kay matag suroy suroy nila mag-andam og makuot nga sarang matunol asa tong nagtapok tapok nga maagian. Sa laktod recycled ra ni nga paagi diin ang ubang magpapili wa mosagop kay ang ilang gusto tinarong og Diniyos.

Moingon man sab ang uban aw kong di ka mokuyog sa ilang lupad siguradong mangamoti ka sa adlaw sa piniliay. Mao nga nagbaha ang mga estorya nga kong wa kay salaping minilyon lisod ang pagkab-ot sa imong mga damgo ug tinguha nga makaserbisyo.

Mao nga halos tanang eleksiyon nga nangagi sandaw kaayo ang mga bag-ong nawong nga magpa pili. Kasagaran balik balik ra gyud. Suwayi ninyo pagpaniid. Sigurado ko nga naa pa moy daghang mamatikdan nga maoy posibling hinungdan nganong daghang kawatan ang maka kuha og puwesto sa pangagamhanan.

Pero naay daghan nga serbisyo ra gyud ang naa sa kasingkasing og hunahuna. Ilaha nang napamatud-an sa dugay nang panahon maoy hinungdan nga kanunayng maglawig ang kabaw matag eskotinyo sa eleksiyon.

Hinuon, ang uban gikaon sa sistima kay sa pangurakot napasanginlan sila.

Duha na ka sunog ang niigo sa Barangay Poblacion Pardo, Cebu City. Ang una nahitabo sa miaging bulan ug ang ikaduha niadtong Biyernes. Sigun sa asoy ni Michael Abarquez, pangu sa Disaster Office sa barangay, gitinguha niya karon nga makig-alayon sa mga silingang barangay sa pagtubag sa alarma sunod nga kabahin sa tahas sa mga tanod.