Pagpuli sa laing gugma
Ning udtuha maoy naabtan ni Romy ang iyang Manoy Pete nga naglingkod sa igdal nga gamot sa dakong punoan sa muwabog, nga naghatag og landong sa lagkaw diha sa kilid niini. Naghinuktok na sab ang magulang niyang ulitawo nga halayo ang panan-aw sa unahan. Nagbanay na ang ilang berde ug tambok nga kamaisan. Nasayod si Romy sa hinungdan sa halawom nga paghinuktok sa iyang magulang.
“Manoy Pete! Hangtod ba karon si Nang Lira ba gihapon ang imong gihunahuna? Kalimti na siya, uy! Naminyo na siya sa lalake nga iyang gipuli nimo, kadtong anak sa adunahang pamilya sa siyudad. Nagbudhi siya nimo kay mag-uuma man lang ka, ug siya usa na ka CPA,” ni Romy.
Nahalingi kang Romy ang iyang magulang.
“Hangtod sa hangtod ang gugma ko kang Lira, Rom!” ni Pete.
“Move on na, Manoy. Sus, kadaghang babaye sa atong baryo nga naghuwat lang nga panguyaban nimo. Naa si Ma’m Riza, ang guwapang maestra nga adviser ko sa Grade 10 nga gitupo ko nimo. Nakagusto ra ba siya nimo. Kalimti na si Nang Lira, uy!”
“Ambot ba, Rom! Usa na ka tuig sukad naminyo si Lira, apan hangtod karon di siya malaksi sa akong hunahuna. Gawas pa, morag nabugnaw na kog panguyab og babaye kay mag-uuma lang ko.”
“Tinuod, mag-uuma lang ka, Manoy, apan swerte ang babaye nga makaangkon sa imong gugma. Tiaw mo bay way hubashubas ang sinangging mais ang atong kamalig! Hilabihan ang pagsanay sa binuhi mong hayupan, babuyan, manukan, bakahan ug kandingan, way labot sa turong kabaw nga imong badi-badi. Pum-an pa sa dakong kantidad nga kuwarta nga tinigom mo sa rural bank sa atong lungsod. Bisag ilo nga tuwapos na ta, haruhay ang atong kahimtang. Hangtod dili ka mahigugma pag-usab, dili mawala sa imong hunahuna si Nang Lira. Tuod, moanhi ron si Ma’m Riza, dinhi sa lagkaw. Nangayo siya nakog kaymito ug buungon.”
Igo lang nakahuman og sulti si Romy milanog ang singgit ni Ma’m Riza sa unahan ning udtoha nga miwara-wara sa iyang mga kamot. “Pete...! Romy...!” Nagpahiyom si Romy nga mitutok sa iyang magulang lalake.
“Atimana ang guwapa kong maestra nga katalirungan nimo, nga puwerting iboga nimo, Manoy! Mamupo kog hinog nga bunga sa kaymito ug buungon. Hangtod di nimo uyabon si Ma’m Riza, di ka makalimot ni Nang Lira!” ni Romy.
Mibathay usab ang pahiyom sa mga ngabil ni Pete. Nakapanglingo siya nga miaper kang Romy. Mikalit kadasig ang iyang panagway nga naghulat kang Ma’m Riza. Misantop sa iyang hunahuna nga sakto si Romy. Kon may gugma nga mawala, may laing gugma nga mopuli. (KATAPUSAN)