Sharks hingpit nanamilit
Misangko na sa utlanan ang kampanya sa Cebu City Sharks human sila gipalagpot sa Davao Occidental Tigers pinaagi sa 76-69 nga kadaugan sa Game 2 sa ilang Southern division 1st round playoff series niadtong Sabado sa gabii sa Maharlika Pilipinas Basketball League (MPBL) 2019 Datu Cup sa Lagao Gym sa General Santos City.
Ang kadaugan sa Tigers maoy nakahuman og sayo sa best-of-three series, 2-0, ug nakahatag kanila og igong kahigayunan aron makapangandam sa 2nd round.
Si Emman Calo, kinsa produkto sa Universityt of the Visayas (UV) Green Lancers, maoy nangulo sa kadaugan sa Tigers pinaagi sa iyang 27 puntos.
Ang kanhi magduduwa sa Philippine Basketball Association (PBA) nga si Mark Yee nidugang og 14 puntos ug makapangangha nga 19 rebounds alang sa Tigers.
Ang Sharks ni coach Titing Manalili nakasiplat na unta og gamay sa pultahan sa kadaugan dihang nakaposte sila og 12 puntos nga labaw, 58-46, sa nahabiling 1:06 minutos sa 3rd quarter.
Apan hinayhinay ra’ng gikitkit sa Tigers ang labaw sa Sharks gikan sa pagsugod sa 4th quarter hangtod nga nakompleto nila ang ilang misyon.
Ang Sharks gipangulohan nila ni Jayford Rodriguez ug William McAloney.
Taliwala sa kapakyasan, mapasigarbuhon gihapon ang Sharks nga nakaabot sa playoffs bisan pa man sa bati kaayo nilang pagsugod sa kampanya.