Argao, Talisay, Balamban pabiling wala pay pildi

Tagsatagsang gikutlo sa defending champions Talisay City Aquastars ug Balamban Shipbuilders ang ilang ikaduhang kadaugan sa nagpadayon nga 3rd Cebu Governor’s Cup Inter-cities/municipalities 21-under basketball championships niadtong Sabado, Marso 16, sa managlahing dapit.

Ang Aquastars, way pildi sa niaging tuig, yanong midominar sa host Naga City Electrifiers, 86-71, sa 1st District Division nga gipahigayon sa Enan Chiong Activity Center.

Ang panagkumboya nila ni Clark Ruedas ug John Villabrille maoy nahimong mahait nga hinagiban sa Aquastars kinsa wa makabaton og pagpanghudlat sa maong panagengkuwentro.

Samtang sa Mayor Exasperanza Binghay Memorial Complex, makutas nga kadaugan ang nakulit sa host Balamban Ship Builders human nila patapsingi ang bisitang Barili Toros, 80-75, sa 3rd District Division.

Perming naggukod ang Balamban sa second half diin nabiyaan kini og otso puntos sa katapusang sais minutos.

Apan ang Ship Builders, sa kalit lang, mipahagsa og rally nga giduslitan sa duha ka tres ni Joshua Gellaconi aron sakmiton ang 71-68 nga labaw.

Sa laing duwa sa 1st District, gipakaging sa Carcar City Lechoneros ang Minglanilla Archangels, 81-76, samtang gidabo-dabohan sa San Fernando ang Sibonga, 81-66.

Sa 2nd District, gilubong sa Argao abg Boljoon, 8879, aron irehistro ang ilang ikatulong daog. Gipukan sa Oslob ang Alcoy 88-84, samtang kulbahinam nga napildi sa Samboan ang Santander, 76-72.

Ang ubang resulta: 4th District:

Madridejos 71, San Remigio 69; Tabuelan 98, Santa Fe, 97-58;

5th District:

Sogod 98, Borbon, 88; Danao 82, Poro 71; San Francisco 88; Tudela, 54.

7th District:

Moalboal 78, Alcantara 50; Dumanjug 91, Ronda 65; Alegria 95; Malabuyoc 84; Badian 95, Ginatilan 91.