Till there was you
Gilugod ko ang akong mga mata. Apan mao gihapon ang akong nakita. Bisag wa mag-tubang nako ang lalake nga naglingkod duol sa altar, pamilyar ko ang iyang bayhon, morag si Fidel gyud. Apan imposible. Tua siya sa Davao, ug tingklase rong panahona, di tingbakasyon.
Unya miatubang ang maong lalake nako. Shocking gyud kay wa man ko masayop. Si Fidel gyud kini. Nahibulong ko kon nganong nia siya sa Cebu. Mibalik kaha siya kay wa niya makuha ang iyang tuyo sa una niyang pagpauli dinhi sa Cebu? Nagkakusog ang pagpitik sa akong kasingkasing. Bisag unsaon pa nakog hikalimot niya di gyud ko makahimo. Usa ra man gud ang rason kon nganong naingon ko ani.
True love gyud ang akong gibati kang Fidel. Naanugnan ko sa akong gugma kaniya kay wa man siyay gugma nako.
Nahunong ang akong paghunahuna kang Fidel ug sa akong gibati niya dihang misulod na sa altar ang pari. Nagsugod dayon ang Santos nga Misa.
Pagkahuman sa Misa, nagdali kong migawas sa simbahan. Gihuwat ko si Fidel apan nakugang ko kay duna diay siyay kuyog nga babaye. Guwapa ang babaye, ug puparehas lag edad namo ni Fidel. Malipayon sila nga nanglakaw.
Nagdali kong mibiya sa akong nahimutangan. Nakahilak ko. Maayo gani kay nag-andam kog panyo. Dali ra kong nakapahid sa akong mga mata.
Milargo kog sulod sa akong kuwarto pag-abot ko na sa among balay. Nakapanghupaw ko. Wa gyud koy suwerte sa akong lovelife. Naa unta si Arnold nga nahigugma gyud nako apan wa sab koy gugma niya. Si Fidel ang natingban sa akong pagmahal apan wa man sab siyay gugma nako.
Kadtong babaye nga iyang gikauban sa simbahan segurado kong iyang girlfriend.
Unya naigking ko dihang mitingog ang akong selpon. Usa ka text message ug pagsusi ko pa, si Fidel ang nagpadalag mensahe nako. Puwerteng kusoga sa pagbutuk-butok sa akong dughan. Ug gibati ko gyud ang grabeng kalipay.
“Musta ka na? Sori karon lang ko nakateks nimo.”
Dali kaayo kong nakareplay. ‘K lang ko. Guwapa man diay ang imong uyab. Nakita ta mo sa simbahan ganina.”
Gihuwat ko ang replay ni Fidel. Misamot kakusog ang pinitik sa akong kasingkasing. (SUMPAYAN)