TNT NO.2 ANG TUYO
Mga duwa karon
4:30 pm- Talk N’ Text batok NorthPort
6:45 pm- San Miguel batok Alaska
Ilugon og suway sa Talk N’ Text KaTropa ang No.2 spot sa ilang pagpakigbatok sa NorthPort Batang Pier sa premirong duwa karong hapon sa Philippine Basketball Association (PBA) 2019 Philippine Cup sa Araneta Coliseum.
Ang KaTropa mao ang labing init nga puwersa sa kasamtangan gumikan kay gikan kini sa lima ka sunodsunod nga kadaugan diin ang labing ulahi nilang biktima mao ang Columbian Dyip, 10198, niadto lang Biyernes.
Ang Katropa, nga mosagubang sa katapusan nilang tahas sa elimination round, kasamtangang nakapuwesto sa ikatulong dapit dala ang 7-3 nga rekord.
Kon modaog ang KaTropa, hayan ilang ikauban sa ikaduhang luna ang Rain or Shine Elasto Painters nga adunay 8-3 nga rekord.
Pinaagi sa winner-over-theother nga pagbuak sa tabla, ang KaTropa mao ang makalansang sa No.2 samtang modakin-as sa No.3 ang Rain or Shine.
Importante ang pagsulod sa top 2 gumikan kay aduna kini makuhang twice-to-beat nga bintaha sa quarter-finals.
Ang Phoenix Pulse Fuel Masters, nga ninghuman sa ilang mga tahas sa elimination round dala ang 9-2 nga rekord, mao ang napanag-iya sa No.1 nga luna.
“Very important game,” matod ni KaTropa coach Bong Ravena sa interbyu sa PBA.PH.
“Still a must-win game for us every game and hopefully, last game we’ll come out strong. We have to win our last game.”
Sa ilang bahin, ang Batang Pier nagkumpayot sa labing ubos nga puwesto nga adunay 2-6 nga rekord.
Kon mapilde ang Batang Pier ning sangkaa, hayan usa sila sa mga matagak sa elimination round.
Kinahanglang modaog ang Batang Pier sa katapusan nilang tulo ka mga tahas lakip na ning duwaa aron magpabiling buhi ang ilang poruhan sa quarter-finals.
Sa main game, mag-abot ang defending champion San Miguel Beermen ug Alaska Aces sa importante sab nga kombati.
Ang Beermen kasamtangang naa sa ikalimang dapit dala ang 6-4 nga rekord samtang naa sa ikawalo ang Aces nga adunay 4-5 nga rekord.
Mas maayong puwesto sa quarter-finals mao ang parehong tinguha sa Beermen ug Aces.