‘NANGHASI’ NAPATAY SA PULIS

Gipasabot ni Police Major Miguel Andeza, hepe sa Mactan Police Station sa Lapu-Lapu City Police Office LCPO, lehitimo ang ilang pagresponde sa usa ka trouble alarm sa Sitio Isoya, Brgy Mactan, Dakbayan sa Lapu-Lapu, nga niresulta sa pagkapatay sa giingong nagpasiugda sa kagubot niadtong Huwebes.

Ang napusilan patay sa kapulisan nga giingong nagpasiugda sa usa ka family trouble nailhang si Norman Arellano, 41, lumolupyo sa nahisgotang lugar.

Matod ni Andeza nga dihang niresponde sila sa alarma, giingong wa mopatuo si Arellano sa ilang mga responding officer nga niabot sa lugar.

Giingong gi-warningan pa sa iyang personnel si Arellano sa pagbutang sa iyang gigunitang kutsilyo atol sa iyang pagpanghasi.

Apan inay nga mopatuo, niaksyon na hinuon kini og hamag sa iyang sakop hinungdan nga gipusil gamit ang long firearm.

Long firearm ang sagad dad-on sa mga pulis kon moresponde ug mga alarma, sumala pa ni Andeza.

Dali untang gidala sa tambalanan si Arellano apan nakabsan sa kinabuhi.

Nakuha sa posisyon ni Arellano ang usa ka lima ka pulgada nga kutsilyo.

Ang igsuon ni Arellano maoy nanawag og pulis gumikan sa giingong pagpanghasi niini gamit ang kutsilyo.

“Dunggabon man atong pulis. Niaksyon og sukol ba. Gi warningan, pulis ni. Wala man siya moila, niingon man nga dili na mubuto imong armas plus ang agianan aprke kaayo. Niharong man mao no choice nga gipikhan na lang gyud sa tiyan,” pagpasabot ni Andeza.

Sa inisyal nga pakisusi sa kapulisan, wa record sa ilang buhatan si Arellano.

Gibutyag usab ni Andeza nga wa pa makahisgot kaniya ang kabanay ni Arellano kon mopasaka sila og reklamo batok sa pulis nga nakapusil kaniya.

“Murag kanang psychological effect man siguro nga naboryong o unsa, unya ang pulis way kalibotan, di kaila, mao to napusilan gyud,” matod ni Andeza.