‘AWAY SA DAN’: 1 PATAY

Kon magmaneho og sakyanan, two-wheeled o fourwheeled, di maayong ipatigbabaw ang kainit sa ulo aron malikayan ang road rage.

Duna nay mga kaso sa away sa karsada nga ningkalas og mga kinabuhi.

Niadtong Huwebes sa gabii, laing kinabuhi ang nakalas tungod sa gituohang road rage.

Nadasmagan sa usa ka trailer truck ang lalakeng nagsakay sa iyang scooter human malabay kay giingong gipatiran sa laing tawo nga nagmotorsiklo nga gituohang iyang gikalalis sa national highway sa Brgy. Langtad, Dakbayan sa Naga.

Si Eben Entice, 32, taga Brgy.Ylaya, lungsod sa San Fernando dead-on-arrival (DOA) sa Minglanilla District Hospital human siya madasmagi sa trailer sa prime mover truck nga gimaniho ni Rolando Compasion, 50, taga Brgy. Dumlog, Dakbayan sa Talisay.

Si Supt.Jason Villamater, hepe sa Naga Police Station nga nahinabi sa Superbalita Cebu, nibutyag nga sakay sa iyang Yamaha Mio scooter si Entice padulong mopauli sa ilang balay.

Si Compasion nisulti sa mga pulis nga iyang nabantayan sila si Entice ug laing lalake, nga nagmaneho og motorsiklong Honda XRM kolor itom, nga naglalis.

Nagsunod siya sa duha samtang nagpadulong sa habagatang Sugbo.

Matod ni Compasion nga sa kalit lang, gipatiran sa lalake ang scooter ni Entice.

Nawad-an sa control si Entice sa manubela dayong kalamba hinungdan nga nadasmagan siya sa truck.

Nakaangkon si Entice og grabeng mga kadaut sa ulo ug lawas tungod sa impact hinungdan sa iyang kamatayon.

Ang namatid giingong dali nga nisibat nga wa na mabantayi ni Compasion diin padung.

Si Compasion niingon nga nakalitan siya sa hitabo hinungdan nga wa na siya maka-brake dayon.

Bisan pa sa alegasyon sa drayber, manubag si Compasion, matod ni Villamater.

Mangita usab sila og saksi nga hayan nakakita sa hitabo.

Kasong reckless imprudence resulting in homicide ang ipasaka sa kapulisan batok kang Compasion. /