Gasa sa pulis

Sobra ra seguro nga hingpit did-an ang kapulisan sa pagdawat og gasa. Ang gasa maayong mithi sa pagpaambit. Dili lang pulis ang nakabenepisyo niini, apan halos tanan lakip sa media bisan dili pasko o adlaw nga natawhan o ubang espisyal nga kasaulogan. Ang pagkakurakot pamatasang natisok sa usa ka tawo, walay kalabotan ang gasa nga gihatag o nadawat. Hinuon, mas maayo nga ang usa ka kawani sa kagamhanan, dili lang pulis, makamao moila sa gasa nga nagdala og bugti nga pabor.

Bisan si Presidente Rodrigo Duterte nga nipadayag og hugot nga pasidaan batok sa korapsiyon, apan walay problema kon ang kapulisan modawat og gasa kon makaila sa motibo ug gidak-on sa gihatag nga gasa.

Ug si Police Brig. Gen. Debold Sinas, direktor sa Police Regional Office (PRO) Central Visayas, wala siya modasig sa iyang mga sakop nga modawat sa tanang gasa nga ihatag kanila apan, kon di kalikayan, kinahanglan nga magbantay sa motibo.

Dili angayan nga abusaran sa kapulisan ang pagdawat sa mga gasa basin dili na hinuon kini motrabaho kung wala nay bayad nga magpaabot kanila. Giklaro ni Sinas nga hugot sa ilang baruganan nga dili modawat og kwarta o gasa gikan sa drugas ug ilegal nga sugal nga video karera, masiao ug uban pa.

Ang liderato sa Philippine National Police (PNP) niangkon nga duna pay abusadong kapulisan sa ilang han-ay hinungdan nga nagpadayon ang ilang internal cleansing. Nanawagan sa publiko sa pag-abag sa ilang lakang ngadto sa katarong.

Samtang, wa nay igong rason ang kapulisan o bisan ang ubang kawani sa kagamhanan human ang ilang suweldo ug ubang benepisyo gipatas-an kon itande sa mga pribadong kompaniya. Sukwahi kaniadto. Dugang pa, ang seguridad sa trabaho.

Sunod nga buwan ‘ber’ (September) na, sinugdanan sa taas nga kasaulogan sa Pasko sa mga Pinoy. Nagpasabot nga panahon na sab sa tinghatag o dawat og gasa. Timan-i ang pasidaan.