Giromansa ang komitiba

Walay chairmanship sa hunta probinsyal nga nahuptan ang presiding officer nga si Vice Gov. Junjun Davide ug upat ka alyadong bokal Jose Mari Salvador, Horacio Franco, Miguel Magpale ug Jerome Librando.

Hinuon, si Franco nahimong assistant majority floorleader nga sa sayo pa mipadayag og suporta ni Gov. Gwen Garcia. Si Salvador maoy vice chairman sa public services ug Magpale maoy vice chairman sa informations and communications technology. Walay mibarog nga lider sa minoriya.

Majority floorleader si Bokal Christopher Baricuatro. Si Bokal John Ismael Borgonia maoy nakaromansa sa tulo ka komitiba nga mao

ang complaints and investigations, provincial and municipal properties ug environmental conservations. Balig 28 ka komitiba ang gihakop sa mayoriya.

Sa siyudad sa Sugbo walay nahuptan nga komitiba ang pito ka mga sakop sa minoriya. Minority floorleader si Konsehal Nestor Archival.

Hinuon ang SK Federation Jessica Resh maoy nagtimon sa committe on youth and sports development ug ABC Federation Franklin Ong sa barangay affairs basi sa nalatid nga kaakohan.

Sa 25 ka komitiba nga gibabig ang presiding officer nga si Vice Mayor Mike Rama maoy nakaromansa sa upat ka komitiba nga mao ang health, foreign relations, tourism and humanities ug environmental concerns.

Si Konsehal Raymond Garcia maoy majority floorleader ug chairman sa tulo ka komitiba usa niini ang budget and finance.

Si Konsehal Tony Cuenco maoy president pro-tempore ug chairman sa duha ka komitiba.

Tagtulo ka komitiba sila Konsehal Edu Rama, Philip Zapra ug Junjun Osmena. Duha kang Konsehal Nina Mabatid. Tagsa sila si Konsehal Dondon Hontiveros, Jerry Guardo ug Dave Tumulak.

Sila si Guardo ug Tumulak mitapon og balik sa grupo ni Mayor Edgar Labella mitalikod gilayon sa BOPK. Dunay posibilidad nga makasulod sa konseho si Amay Abella ug mataktak si Zapra human si Sherwin Luie Abella gi-disqualify sa Comelec isip nuisance candidate. Hinuon, gitataw nga abtan og siyam-siyam nga moabot nalang ang sunod eleksyon. Hanap ang maong kahigayonan.

Kamada sa mayoriya sa konseho kaabag ni Labella sa pagpatuman sa 10 ka prayoridad: pagsulbad sa baha, daling business ug building permits, modernong digital traffic lights, epiktibong koleksyon sa basura, bayaran ang nahibiling utang sa SRP, pagtibawas sa CCMC, libreng pamahaw ug uniporme sa mga tinun-an sa publikong eskuylahan, pagtukod og city college, suporta sa PNP ug paghuman sa Phase II Carbon Market.(csa_1156@

yahoo.com/09064648954)