Duha ang kubit

Dear Noy Kulas,

Maayong adlaw nimo! Naaghat ko padala aning akong suliran kay naglibog na ko. Tawga lang ko og Shen, 26 years old.

Ang akong problema mao ang akong duha ka mga uyab nga wa magkahibaw-anay. Puro ni sila Pinoy ug taga Cebu. Ang usa akong classmate sa college while ang usa sa high school. Naa na silang duha sa abroad nag work.

Actually puro ni sila akong exes kay ako silang mga uyab kaniadto. Wa sila magkahibaw-anay. Maluoy ko nila kay puro sila galante mogasto nako. Ang akong problema kay silang duha nag propose na nga makigminyo nako next year kay wa kuno sila magkabatan-on. Maguwang ra sila nakog two years.

Makaingon kong lisod pilion kay pareho ra sila kabug-at para nako kay mga buotan, caring ug responsible. Bisan ang akong pamilya ganahan kaayo nilang duha. Pero wa ko magsaba nga silang duha akong mga uyab kay gipatuo nako ang akong family nga close friends ra nako sila. Noy, unsaon ni nako karon? Di ko gustong dunay masakitan nilang duha kay naa koy feeling nila nga di ordinary. Pwede diay mag love og duha noh?

SHEN,

Shen,

Bitaw, pwede tingali mahigugma og duha ka tawo. Apan di man mahimong lumpungon nimo ang duha ka mga lalake ug silang duha ang imong pakaslan. Gikinahanglan kang mamili nilang duha kon uyon ka sa proposal nga minyo. Either nila, mogawas nga bati ka tungod kay mahibaw-an ra man na nga duha sila nga imong gipanglumpong. Di ra ba maayo nga mamasol sa duha ka mga suba.

Sama sa uban nga ako nang gitambagan, pag cool off mo sa imong mga karelasyon karon aron mahatagan kag panahon sa pagtimbang og maayo kinsa kanilang duha ang imong pilion. Diha usab nimo makita kon unsa ang ilang reaction sa sitwasyon. Diha nimo masuwayan kon unsa ang ilang tinuod nga pagkatawo sa sitwasyon diin sila masakitan og maayo. Molutaw ang tinuod nilang pagkatawo sa sitwasyon nga sakit.

Human sa tanan, pakigsulti silag tagsa sa imong makab-ot nga hukom.

NOY KULAS