Never change
Di ko makalimot sa panahon nga nagkaila mi si Carlo. One night gikan ko sa eskuwelahan. Kusog ang uwan. Ako rang usa ang diha sa waiting shed. Dugay kong nakasakay kay diyotay ra ang dyip nga nagbiyahe kay nagbaha sa siyudad. Ug puno sa mga pasahero. Unya dunay miduol nakong duha ka lalaki. Nakalitan ko ug nahadlok dihang gitionan kog kutsilyo sa usa ka lalaki, samtang ang usa mikuha sa akong shoulder bag.
Wa ko makalihok. Igo na lang kong mihilak. Dihang mobiya na unta nako ang duha ka lalaki dala ang akong shoulder bag nga diha sa sulod
ani ang akong mahalong selpon, kuwarta ug uban pa nakong mga gamit, nakahimo na kog singgit. Nagpangayo kog pakitabang.
Ug usa ka lalaki ang nagdaling mitabang nako. Nakigsumbagay siya sa duha ka lalaki. Nakita nako nga hanas sa karate ang maong lalaki. Nahiabot ang usa ka polis. Pulos naglisod pagtindog ang duha ka esnatser tungod sa nahiagomang mga bun-og. Gidakop ang mga tulisan.
Dinhi mi nagkaila sa lalaki, Carlo ang iyang ngalan.
“Salamat, ha, Carlo. Di pa tungod nimo, nadayon gyud untag kawat ning akong shoulder bag ug ang mga sulod ani.”
“Way sapayan, Rona. Gibuhat ko lang ang angay.”
Gihatod ko ni Carlo sa among balay. Duna diay siyay awto. Parehas sila si Reenan, anak og dato. Dinhi magsugod nga nagkasuod mi si Carlo. Nahiduol ang akong pagbati niya kay sa akong pagtuo, usa gyud siya ka tinuod nga lalaki, kasaligan ug makaprotektar nako. Inanay nga nawala sa akong dughan si Reenan.
Ug karon, nakigbuwag na ko kang Reenan.
“Panghinauton ko ang inyong kalipay ni Carlo, Ron.”
Nagkalagyo ug nagkabuwag mi si Reenan nga friend lang gihapon. Kon magkakita mi sa eskuwelahan, magtinagdanay mi. Mag-estorya. Usahay magkadungan pa gyud mig esnak sa school canteen ug sa pagpaniudto sa suki namong karenderya sa gawas sa university.
Dunay mga gabii nga dugay kong makatulog. Mahunahuna ko si Carlo. Magpamisitahan siya nako sa among balay. Apan kutob ra dinhi. Wa siya mangulitawo nako.
“Komusta diay ang imong study, Carl?”
Usa ana ka gabii nga namisita siya nako, wa ko makapugong sa pagpangutana niya. Sa laing university siya nag-eskuwela. Wa dayopn siya motubag nako. Gitan-aw ko niyag dugay. (SUMPAYAN)